شاہد ٹاک
شوپیان //جنوبی کشمیر کے شوپیان ضلع میں مشتبہ ملی ٹینٹوںنے تین غیر ریاستی مزدوروں پر فائرنگ کردی جس کی وجہ سے وہ زخمی ہوگئے ۔انہیں پہلے ضلع اسپتال اور بعد میں سرینگر منتقل کیا گیا، انکی حالت مستحکم بتائی جاتی ہے ۔ شوپیاں قصبہ کے گاگرن علاقے میں جمعرات کی شام دیر گئے قریب 9بجے نامعلوم ملی ٹینٹوں نے3 غیر ریاستی مزدوروں پر فائرنگ کی۔ پولیس کے مطابق مشتبہ ملی ٹینٹ گاگرن میں ایڈوکیٹ ارشاد حسین صوفی کے مکان کے نزدیک کرایہ داروں کیلئے بنائے گئے کمروں میں عارضی طور پر رہائش پذیر مزدوروں کے کمرے میں گھس گئے اور ان پر گولیاں چلائیں جسکی وجہ سے تینوں زخمی ہوگئے ۔زخمی مزدوروں کو فوری طور پر ضلع اسپتال شوپیان لایا گیا جہاں ابتدائی طبی امداد کے بعد انہیں بہتر علاج و معالجہ کیلئے سرینگر کے ایس ایچ ایم ایس ہسپتال منتقل کیا گیا جہاں پر انکی حالت مستحکم ہے ۔زخمی مزدوروں کی شناخت انمول کمار ولد امردیپ ، ہیرالال یادو ولد دارسی یادو اور پنٹو کمار ولد سشیل کمار کے بطور ہوئی ہے ۔تینوں سیپول بہار کے رہنے والے ہیں ۔یاد رہے کہ جس جگہ پر ان تین غیر ریاستی مزدوروں پر فائرنگ کی گئی ، اس جگہ سے محض ڈیڑھ سو میٹر کی دوری پر پولیس کے اسپیشل آپریشنز گروپ کا کیمپ موجود ہے ۔ حملہ کے فوراً بعد پولیس و فوج نے مشترکہ طور پر پورے علاقے کو گھیرے میں لیکر گھر گھر تلاشی شروع کردی اور حملہ آوروں کو ڈھونڈ نکالنے کیلئے آپریشن کا آغاز کیا۔علاقے میں رات گئے تک تلاشی کارروائی جاری تھی۔
