سرینگر/جنوبی کشمیر کے شوپیان ضلع میں جمعہ کو جنگجوئوں اور فورسز کے مابین معرکہ آرائی کی جگہ کے آس پاس ہونے والی جھڑپوں میں کم سے کم17مظاہرین زخمی ہوگئے جن میں سے تین کو علاج و معالجہ کیلئے سرینگر منتقل کیا گیا۔
یہ جھڑپیں اُس جگہ کے آس پاس ہوئیں جہاں فورسز کے ساتھ معرکہ آرائی کے دوران تین جنگجو جاں بحق ہوگئے۔
پولیس ذرائع کے مطابق فورسز نے شوپیان کے امام صاحب علاقے میں واقع آڑکھار نامی گائوں میں تلاشی آپریشن شروع کیا جس کے دوران چھپے جنگجوئوں نے فورسز پارٹی پر گولیاں چلائیں۔
انہوں نے مزید کہا کہ فورسز نے جوابی کارروائی عمل میں لائی جس کے بعد طرفین کے مابین معرکہ شروع ہوا۔
اس معرکہ میں تین جنگجو جاں بحق ہوگئے جن کی شناخت ہونا ابھی باقی ہے۔
معرکہ آرائی کے مقام کے آس پاس فورسز اور مظاہرین کے درمیان شدید جھڑپیں ہوئیں جن کے دوران فورسز نے ہوائی فائرنگ اور پیلٹ فائرنگ کا استعمال کیا۔
فورسز کارروائی میں ذرائع کے مطابق کم سے کم17افراد زخمی ہوگئے جن میں سے پیلٹ لگنے سے تین زخمیوں کو سرینگر منتقل کیا گیا۔
ایک زخمی کی شناخت مدثر احمد نامی ایک نوجوان کے طور ہوئی ہے جس کی ٹانگ میں گولی لگی ہے۔
دریں اثناء حکام نے معرکہ آرائی کے فوراً بعد شوپیان ضلع میں انٹر نیٹ سروس معطل کردی۔
واضح رہے کہ شوپیان اور پلوامہ ضلعوں کے اندر لوک سبھا پولنگ کے تحت 6مئی کو ووٹ ڈالے جارہے ہیں۔
