سرینگر/جنوبی کشمیر کے کئی علاقوں میں جمعہ کو مظاہرین اور فورسز کے مابین جھڑپیں ہوئی ہیں ۔یہ جھڑپیں جنوبی ضلع شوپیان میں فورسز اور جنگجوئوں کے مابین معرکہ کے دوران دو جنگجوئوں کی ہلاکت کے بعد شروع ہوئیں۔
پولیس ذرائع کے مطابق فورسز نے شوپیان کے امام صاحب علاقے میں واقع آڑکھار نامی گائوں میں تلاشی آپریشن شروع کیا جس کے دوران چھپے جنگجوئوں نے فورسز پارٹی پر گولیاں چلائیں اور بعد میں شروع ہوئی معرکہ آرائی کے دوران دو جنگجو جاں بحق ہوگئے جن کی شناخت ابھی نہیں ہوئی تھی۔
ذرائع کے مطابق یہاں مدثر احمد نامی ایک نوجوان ٹانگ میں گولی لگنے سے زخمی ہوگیا جسے اسپتال پہنچایا گیا ہے۔
اطلاعات کے مطابق معرکہ آرائی کے مقام کے آس پاس سینکڑوں نوجوانوں نے فورسز کو پتھروں سے نشانہ بنایا جنہوں نے ٹیر گیس شیلنگ اور ہوائی فائرنگ سے جوابی کارروائی عمل میں لائی۔
مظاہرین اور فورسز کے مابین جھڑپوں کی اطلاعات اننت ناگ کے لال چوک،ریشی بازار اور اولڈ ٹائون علاقوں سے بھی موصول ہوئی ہیں۔
دریں اثناء حکام نے معرکہ آرائی کے فوراً بعد شوپیان ضلع میں انٹر نیٹ سروس معطل کردی۔
واضح رہے کہ شوپیان اور پلوامہ اضلاع کے اندر لوک سبھا پولنگ کے تحت 6مئی کو ووٹ ڈالے جارہے ہیں۔
