سرینگر/حکام نے جمعرات کو کہا کہ شمال و جنوب میں جنگجوئوں اور فورسز کے مابین دو الگ الگ معرکہ آرائیوں کے دوران چار جنگجو جاں بحق ہوگئے ہیں۔
پولیس نے کہا کہ جنوبی کشمیر کے شوپیان ضلع میں جنگجوئوں اور فورسز کے مابین جو معرکہ آرائی جاری تھی وہ اختتام پذیر ہوگئی ہے اور اس میں فورسز کے ہاتھوں جو تین جنگجو جاں بحق ہوگئے ،اُن کی شناخت ہوگئی ہے۔
پولیس نے جاں بحق جنگجوئوں کی شناخت سجاد کھانڈے،عاقب احمد ڈار اور بشارت احمد میر کے طور کرتے ہوئے کہا کہ یہ تینوں ضلع پلوامہ کے باشندے تھے۔
اس سے قبل شوپیان ضلع کے کیلر علاقے میںآج صبح جنگجوئوں اور فورسز کے مابین معرکہ آرائی کا آغاز ہوا جس کے دوران تین عسکریت پسند مارے گئے۔
یہ معرکہ شوپیان کیلر کے جنگل میں واقع یارون نامی علاقے میں پیش آیا۔
پولیس ذرائع نے کہا کہ فوج نے یارون جنگل علاقے کو محاصرے میں لیکر تلاشیاں شروع کیں جس کے دوران فورسز اور جنگجوئوں کا آمنا سامنا ہوگیا اور طرفین نے ایک دوسرے پر گولیاں چلائیں۔
پولیس نے کہا کہ فورسز کو یہ اطلاع موصول ہوئی کہ جنگجو شمالی کشمیر کے یارو لنگیٹ ہندواڑہ علاقے میں چھپے بیٹھے ہیں تو پولیس اور فورسز نے مشترکہ طورپر فورا اس علاقے کو محاصرے میں لے لیا اور جنگجوئوں کو ڈھونڈ نکالنے کیلئے کارروائی شروع کی۔
پولیس کے مطابق فرار ہونے کے تمام راستے مسدود پا کر جنگجوئوں نے فورسز پر اندھا دھند فائرنگ شروع کی۔
پولیس نے کہا کہ فورسزنے بھی جوابی کارروائی کا آغاز کیا اور اس طرح سے طرفین کے مابین معرکہ آرائی شروع ہوئی۔پولیس نے اپنے ایک بیان میں کہا کہ کچھ وقت تک جاری رہنے والی اس معرکہ آرائی میں ایک جنگجو جاں بحق ہوگیا۔
پولیس نے مزید کہا کہ فورسز نے جائے واردات پر مہلوک جنگجو کی نعش برآمد کرکے اس کی شناخت اور تنظیمی وابستگی کے بارے میں جانچ پڑتال شروع کی ہے۔
