شوپیان اور ترہگام میں پیلٹ کا قہر لوٹ آیا

سرینگر// حزب کمانڈر برہان وانی کی پہلی برسی کے موقعے پر بھی فورسز نے عام شہریوں کے خلاف پیلٹ کا بے تحاشہ استعمال جاری رکھتے ہوئے پچھلے 24گھنٹوں میں شوپیاں اور سرحدی ضلع کپوارہ میںپیلٹ چلاکر12خواتین سمیت 32افراد کوزخمی کردیا ہے جن 4افراد کی آنکھیں پیلٹ لگنے سے متاثر ہوئیں ہیں ۔ آنکھوں میں پیلٹ لگنے سے زخمی ہونے والے4افراد میں ایک کی دونوںانکھیں متاثر ہوئی ہے جبکہ باقی تین کی ایک ایک آنکھ متاثر ہوئی ہے۔شوپیاں اور کپوارہ مین پیش آئے واقعات کے دوران 12خواتین سنیچر کو شوپیاں میں زخمی ہوئیں جبکہ 20افرد سرحدی ضلع کپوارہ کے ترہگام علاقے میں جمعہ کی نماز کے بعد پیش آئے واقعے میں 20افراد زخمی ہوئے تھے۔ شوپیاں میں سنیچر کو زخمی ہونے والی 12 خواتین میں سے شدید زخمی سارہ کو سرینگر کے صدر اسپتال منتقل کیا گیا جبکہ باقی 11خواتین کا علاج ضلع اسپتال شوپیاں میں کیا گیا ۔ صدر اسپتال سرینگر کے وارڈ نمبر 7میں زیر علاج 45سالہ سارہ نے کشمیر اعظمیٰ کو بتایا ’’ سنیچر کی صبح گھر کے باہر ہی پڑوسی اپنے مکان کی سیلیب ڈالنے میں مصروف تھے اور ہم محلہ کی چند خواتین وہاں جمع ہوئیںتھیں۔ سارہ نے بتایا کہ پولیس اور سی آر پی ایف کی ایک پارٹی ہمارے پاس آئی اور ہمارے خلاف ناشائستہ الفاظ کا استعمال کیا۔‘‘ سارہ نے بتایا کہ تمام خواتین نے سیکورٹی فورسز اہلکاروں کی ناشائستگی کا کوئی جواب نہیں دیا اور اپنے گھروں کی طرح روانہ ہونے لگی تاہم جوں ہی فورسز اہلکاروں کی یہ پارٹی ہم سے قریب 12فٹ کی دوری پر پہنچے تو فورسز کی پارٹی میں شامل ایک پولیس اہلکار نے خواتین کو نشانہ بناکر پیلٹ چلایا جس سے12 خواتین زخمی ہوگئی جن میں 4خواتین علی محمد پال کے کنبے سے تعلق رکھتیں ہے جبکہ غفار پال اور غلام محمد ریشی کے کنبے میں دو دو خواتین زخمی ہوگئی ہیں ۔ سارہ نے بتایا کہ  عبدالرحمان بٹ اور نذیر احمد وانی کے کنبے میں ایک ایک خاتون پیلٹ لگنے کی سے زخمی ہوگئی ہے۔ سارہ نے بتایا کہ پیلٹ لگنے کی وجہ سے زخمی ہونے والی خواتین کو ضلع اسپتال شوپیاں منتقل کیا گیا جہاں سارہ کو سرینگر کے صدر اسپتال منتقل کرنے کی ہدایت دی ۔ سارہ نے بتایا کہ دائیں آنکھ چھروں کی زدمیں آکرزخمی ہوگئی  جس کے بعد علاقے کے لوگ فورسز اہلکاروں کے خلاف مظاہرہ کرنے پر مجبور ہوگئے ہیںجس کے بعد ایک مرتبہ پھر فورسز اہلکار علاقے میں گھسے اور مکانوں کی توڑ پھوڑ شروع کردی ۔ ادھرجمعہ کو جامعہ مسجد ترہگام میں فورسز اہلکاروں کی جانب سے لوگوں پر شیلنگ کی وجہ سے 20افراد زخمی ہوگئے ہیں جن میں شدید زخمی تین نوجوانوں کو سرینگر کے صدر اسپتال منتقل کیا گیا ہے۔ترہگام کپوارہ کی جامعہ مسجد میں ٹئیر گیس شل اور پیلٹ لگنے سے شدید زخمی ہونے والے 20سالہ جاوید احمد میر ولد گلزار احمد میر ساکنہ ترہگام کپوارہ ،عرفان احمد ملک ولد بشیر احمد ملک ساکنہ بن پورہ کوارہ اور 20سالہ راجا وسیم نجار ولد عبدالاحمد نجار ساکنہ ترہگام آنکھوں میں پیلٹ لگنے کی وجہ سے زخمی ہوگئے ہیں۔ کپوارہ میں پیلٹ سے متاثر ہونے والے نوجوانوں میں 20سالہ جاوید احمد میر ولد گلزار احمد میر کی دنوں آنکھیں پیلٹ لگنے سے متاثر ہوئی ہیں جبکہ 13سالہ عرفان احمد ملک کی بائیں آنکھ اور راجا وسیم نجار کی بائیں آنکھ کے علاوہ چھاتی ،بازو اورچہرے پر  پیلٹ لگے ہیں۔ واقعے کی تفصیلات دیتے ہوئے جاوید احمد میر نے کہا ’’ جامعہ مسجد ترہگام کے باہر مظاہرین احتجاج کررہے تھے تو فورسز اہلکار مظاہرین کا تعاقب کرتے ہوئے جامعہ مسجد احاطے پر زبردست شلنگ کرنے لگے اور وہاں نماز کے غرض سے آئے لوگوں پر چھروں کی برسات کردی ۔‘‘ جاوید احمد نے بتایا کہ جوں ہی ہم نماز  ادا کرکے جامعہ مسجد سرینگر سے باہر آٓئے تو فورسز اہلکاروں نے جامعہ مسجد احاطے میں چھروں کی برسات کردی جس میں متعدد افراد زخمی ہوگئے ۔‘‘ جاوید احمد نے بتایا کہ نماز پڑھنے کے بعد جوں ہی میں باہر یا تو اچانک آنکھوں سے خون بہنے لگا جس کے بعد میں بے ہوش ہوگیا۔ ‘‘ جاوید احمد نے بتایا ’’ میری دنوں آنکھوں میں پیلٹ لگے ہیں اور پیلٹ لگنے کی وجہ سے میں کچھ بھی دیکھنے سے قاصر ہوں۔‘‘ راجا وسیم نجار نے بتایا کہ فورسز اہلکاروں نے اندھا دھند چھروں کی برسات کردی جس کے نتیجے میں پیلٹ کا ایک پورا شل میرے بازوں میں جالگا ہے جبکہ چھاتی کے علاوہ پیلٹ لگنے کی وجہ سے میری بائیں آنکھ متاثر ہوئی ہے۔ کپوارہ میں فورسز اہلکاروں کی جانب سے جامعہ مسجد احاطے میں شلنگ کے نتیجے میں جہاں مسجد کا فرش آگ لگنے کی وجہ سے خراب ہوگیا وہیں مسجد احاطے میں 13 سالہ عرفان احمد ملک بھی بائیں آنکھ میں پیلٹ لگنے سے زخمی ہوگئے۔ عینی شاہدین نے بتایا کہ کپوارہ میں زخمی ہونے والے 20افراد میں سے شدید طور پر زخمی 3نوجوانوں کو سرینگر کے صدر اسپتال منتقل کیا گیا جبکہ دیگر 17افراد کا علاج ضلع اسپتال کپوارہ میں کیا گیا۔