عظمیٰ نیوز سروس
نئی دہلی//موسم میں آئی تبدیلی سے ملک کے کچھ حصوں میں راحت ملی ہے تو کئی علاقوں میں آفت آ ئی ہوئی ہے۔ شمالی ہند کی کئی ریاستوں میں بارش سے لوگوں کو شدید گرمی سے نجات ملی ہے وہیں شمالی مشرقی ریاستوں میں شدید بارش اور لینڈ سلائیڈ سے تباہی کا دور جاری ہے۔ اس درمیان محکمہ موسمیات نے دہلی، یوپی اور بہار میں بھی بارش کو لے کر الرٹ جاری کر دیا ہے۔دہلی اور اتر پردیش میں گزشتہ کچھ دنوں میں ہلکی بارش اور آندھی سے موسم میں کچھ تبدیلی ہوئی تھی۔ اس کے بعد تیز دھوپ نے پھر سے موسم کو تلخ کر دیا۔ محکمہ موسمیات کے مطابق دہلی میں آج آندھی کے ساتھ بارش ہونے کے آثار نظر آ رہے ہیں۔ بارش کے بعد درجہ حرارت میں قریب 5 سے 7 ڈگری سیلسیس تک کی گراوٹ دیکھی جا سکتی ہے۔ وہیں اتر پردیش میں بھی بارش کو لے کر الرٹ جاری کیا گیا ہے۔ جبکہ مدھیہ پردیش میں اگلے دو دنوں تک موسم صاف رہنے کا امکان ہے۔شمال مشرقی ریاستوں کی بات کی جائے تو منی پور اور آسام میں آج بھی بارش کا قہر جاری رہے گا۔ ان علاقوں میں سیلاب سے کافی نقصان ہوا ہے۔ آسام، منی پور اور سکم میں کئی شہروں میں مسلسل بارش سے ندیاں طغیانی پر ہیں یہاں تک کہ لوگوں کے گھروں تک پانی داخل ہو چکا ہے۔ کئی گاوں ڈوب گئے ہیں جبکہ شہروں میں سڑکوں پر گھٹنوں تک پانی بہہ رہا ہے۔ لوگوں کو محفوظ مقامات پر پہنچانے کے لیے ایس ڈی آر ایف اور فوج کی مدد بھی لی جا رہی ہے۔ آسام میں مرنے والوں کی تعداد 11 پہنچ گئی ہے جبکہ 5.5 لاکھ سے زیادہ افراد اس قدرتی آفت سے متاثر ہیں۔ دوسری طرف راجستھان کے کئی ضلعوں میں بھی آج موسم کروٹ لے سکتا ہے۔ جئے پور، الور، بھرت پور، سیکر، چرو، بیکانیر، جودھپور، ادئے پور کوٹا سمیت کئی جگہوں پر بارش ہونے کے آثار ہیں۔
منی پور میں سیلاب سے زندگی درہم برہم
عظمیٰ نیوز سروس
امپھال//وادی امپھال اور اس کے آس پاس کے علاقوں میں موسلادھار بارش اور سیلاب کی وجہ سے زندگی مکمل طور پر درہم برہم ہوگئی ہے۔ ایسے مشکل حالات میں ہندوستانی فوج ‘آپریشن جل راحت2‘کے تحت بڑے پیمانے پر راحت اور بچا کی کارروائیوں میں مصروف ہے۔ہندوستانی فوج 31 مئی 2025 سے منی پور کے مختلف سیلاب سے متاثرہ علاقوں میں دن رات امدادی کاموں میں مصروف ہے۔ فوج کے دستے انتہائی مشکل حالات میں کام کر رہے ہیں اور اب تک 1,560 سے زیادہ لوگوں کو محفوظ مقامات پر منتقل کیا جا چکا ہے۔سب سے بڑا ریسکیو آپریشن وانگکھائی میں کیا گیا جہاں سے 584 افراد کو بحفاظت نکال لیا گیا۔ اسی وقت، جے این آئی ایم ایس اسپتال سے 569 لوگوں کو بحفاظت نکال لیا گیا، جن میں 15 حساس مریض بھی شامل ہیں جنہیں فوری طبی امداد کی ضرورت تھی۔ دیگر متاثرہ علاقوں میں بھی امدادی کام جاری ہے۔ 110 افراد کو کھیتائی چنگنگ بام لیکئی سے نکالا گیا۔لائشرم لیکئی سے 115 شہریوں کو بچا لیا گیا۔ لام لانگ کے علاقے سے 65 افراد کو محفوظ مقامات پر منتقل کیا گیا۔ ہنجنگ سے 75 لوگوں کو بچایا گیا جہاں سیلابی پانی تیز کرنٹ کے ساتھ بہہ رہا تھا اور امپھال ندی کا پشتہ ٹوٹ گیا تھا جس سے صورتحال مزید سنگین ہو گئی تھی۔
