یو این آئی
سرینگر// فوج کی شمالی کمان کے سربراہ لیفٹیننٹ جنرل ایم سوچیندر کمار نے سیاچن کا دورہ کیا اور وہاں پر آپریشنل تیاریوں کا جائزہ لینے کے علاوہ دنیا کے بلند ترین مقا م پر اپنی جانوں کا نذرانہ پیش کرنے والے فوجیوں کو خراج عقیدت پیش کیا۔معلوم ہوا ہے کہ شمالی کمان کے سربراہ نے حقیقی کنٹرول لائن کی صورتحال کاموقعہ پر ہی جائزہ لیا۔ دفاعی ترجمان نے بتایا کہ لیفٹیننٹ جنرل نے سیاچن کا دورہ کیا اور وہاں پر فوجی تیاریوں کا ایک اعلیٰ سطحی میٹنگ میں جائزہ لیا۔انہوں نے اس موقع پر بتایا کہ انتہائی مشکل حالات اور سخت ترین موسمی صورتحال کے باوجود بھی فوجی اہلکار اپنی خدمات خوش اسلوبی کے ساتھ انجام دے رہے ہیں۔معلوم ہوا ہے کہ فوجی کمانڈر نے سیاچن کی فوجی چوکیوں کا بھی معائنہ کیا اور وہاں پر تعینات جوانوں سے بھی بات چیت کی اور فوج کی تیاریوں کا جائزہ لیا اور سینئر آفیسران کے ساتھ گفت وشنید کی۔ لداخ میں تعینات فوج کے سینئر آفیسران نے فوجی کمانڈر کو خطے میں سلامتی کی صورتحال سے آگاہ کیا۔دفاعی ترجمان نے ایکس پر جانکاری فراہم کرتے ہوئے بتایا کہ شمالی کمان کے سربراہ نے فائر اینڈ فیوری کارپس ہیڈ کوارٹر کا بھی دورہ کیا اوروہاں پر سینئر آفیسران کے ساتھ حقیقی کنٹرول لائن کی تازہ ترین صورتحال کے بارے میں آگاہی حاصل کی۔ انہوں نے فوجی اہلکاروں کے پیشہ ورانہ مظاہرے کے لئے ان کی حوصلہ افزائی کی اور انہیں مستقبل میں بھی اپنے فرائض پیشہ ورانہ طریقے سے انجام دینے کے لئے کہا۔اس سے قبل ناردرن کمانڈر کو فوج کے سینئر آفیسران نے حقیقی کنٹرول لائن کی صورتحال کے بارے میں بریفنگ دی۔فوجی کمانڈر کو مخالفین کے چیلنجز کا مقابلہ کرنے کے لئے کئے جانے والے اقدامات کے بارے میں بھی جانکاری فراہم کی گئی۔
