زاہد بشیر
گول//گزشتہ روز شدید بارشوں میں دکانداروں کے ساتھ ساتھ زمینداروں و عام شہریوں کو بھی شدید نقصان ہوا ہے جس کے چلتے آج انتظامیہ نے گول بازار کا جائزہ لیا ۔ تحصیلدار گول ہرجیت سنگھ ، نائب تحصیلدار گول ، صدر بیوپارمنڈل ودیگر معزز شہریوں کے ہمراہ گول بازار کا دورہ کیا جہاں انہوں نے گزشتہ روز شدید بارشوں کی وجہ سے دکانداروں کو ہوئے نقصان کا جائزہ لیا ۔ اس دوران تحصیلدار نے گول بازار میں نکاسی آب کا بھی جائزہ لیا ۔ تحصیلدار نے اس موقعہ پر ذرائع ابلاغ کے ساتھ بات کرتے ہوئے کہا کہ ایک دو دن کے اندر اندر گول بازار میں نالیوں کو صاف کیا جائے گا اور جو پلیاں بند پڑی ہوئی ہیں ان کو بھی کھولا جائے گا ۔ انہوں نے کہا کہ جہاں جہاں بھی غیر قانونی طور پر سڑکوں پر تعمیراتی میٹریل و نا جائز تجاوزات ہے اُس کو بھی ہٹایا جائے گا اور عوام کو چاہئے کہ وہ جلد از جلد خود ہی اپنا میٹریل کو سڑکوں کو ہٹائے ۔ انہوں نے اس موقعہ پر گول بازار میں دکانداروں کے نقصانات کے بارے میں کہا کہ اس کا تخمینہ لگایا جائے گا اور انہیں امداد دی جائے گی اور اس کے علاوہ بارشوں سے جہاں جہاں بھی لوگوں کا نقصان ہوا ہے اس کا تخمینہ لگا کر انہیں بھی اعلیٰ حکام تک پہنچایا جائے گا ۔
