نئی دہلی//محبوس مزاحمتی لیڈرشبیراحمدشاہ کی اہلیہ نے انفورسمنٹ ڈائریکٹوریٹ حکام پرذہنی کوفت میں ڈالنے کاالزام عائدکرتے ہوئے کہاکہ مطلوب ریکارڈلینے کے بجائے مجھے اگلی بارآنے کوکہاجاتاہے ۔فریڈم پارٹی کے سربراہ شبیراحمدشاہ کی اہلیہ ڈاکٹربلقیس نے نئی دہلی سے فون پربتایاکہ جب وہ اپنے شوہرسے ملاقات کیلئے گزشتہ دنوں نئی دہلی میں واقع انفورسمنٹ ڈائریکٹوریٹ کے ہیڈکوارٹرآئی تھیں تویہاں اُن سے کئی گھنٹوں تک پوچھ تاچھ کی گئی ،جسکے بعدEDکے افسروں نے اُنھیں ذرائع آمدن اورمنقولہ وغیرمنقولہ جائیدادکے ریکارڈکیساتھ11اگست کو پھرآنے کی ہدایت دی تھی ۔ڈاکٹربلقیس کے مطابق 11اگست کووہ اپنے شوہرشبیرشاہ کیساتھ ملاقات کیلئے چونکہ تہاڑجیل گئی تھیں ،اسلئے اگر روزیعنی12اگست بروزسنیچروارکو وہ اپنی ذرائع آمدن اورمنقولہ وغیرمنقولہ جائیدادکے ریکارڈکیساتھ انفورسمنٹ ڈائریکٹوریٹ کے ہیڈکوارٹرپہنچیں ۔انہوں نے کہاکہ مذکورہ آفس میں اُسوقت موجوداسسٹنٹ ڈائریکٹرای ڈی مسٹرتیاگی نے یہ کہہ کرریکارڈلئے بغیرمجھے واپس جانے کوکہاکہ یہاں اسوقت کوئی خاتون افسرموجودنہیں ہے ۔ڈاکٹربلقیس نے کہاکہ میں نے ای ڈی کے متعلقہ اسسٹنٹ ڈائریکٹرسے اپیل کی کہ وہ اسی وقت یہ ساراریکارڈلے لیں لیکن انہوں نے میری گزارش کوصرف نظرکرتے ہوئے مجھے سوموارکے روزریکارڈلیکرپھریہاں آنے کوکہا۔محبوس مزاحمتی لیڈرشبیراحمدشاہ کی اہلیہ نے مزیدبتایاکہ 14اگست بروز سوموارکومجھے تہاڑجیل میں اپنے محبوس شوہرسے ملاقات کے بعدشاہ صاحب کی گرفتاری کے بارے میں صلاح مشورے کے سلسلے میں ایک قانون داں سے ملناتھا،اسلئے بقول ڈاکٹربلقیس وہ سوموارکوبعددوپہرلگ بھگ 3بجے انفورسمنٹ ڈائریکٹوریٹ کے ہیڈکوارٹرتمام مطلوب ریکارڈلیکرپہنچیں ۔انہوں نے کہاکہ یہاں موجودایک افسرنے بتایاکہ 15اگست کے سلسلے میں کل یہ دفتربندرہے گا،اسلئے آپ15اگست کے بعدپھریہ ریکارڈلیکریہاں آئیں ۔ڈاکٹربلقیس نے کہاکہ میں نے مذکورہ افسرسے بھی التجاکی کہ وہ یہ ساراریکارڈلے لیں لیکن انہوں نے ایساکرنے سے صاف انکارکرتے ہوئے مجھے پھریہاں آنے کی ہدایت دی ۔منی لانڈرنگ کیس کے سلسلے میں گزشتہ ماہ کی25تاریخ سے نئی دہلی میں نظربندمحبوس مزاحمتی لیڈرشبیراحمدشاہ کی اہلیہ ڈاکٹربلقیس نے کہاکہ اُنھیں بلاوجہ ذہنی کوفت کاشکاربنایاجارہاہے ۔انہوں نے کہاکہ انفورسمنٹ ڈائریکٹوریٹ کاکوئی بھی افسرمطلوب ریکارڈلے سکتاتھالیکن مجھے عمداًوقصداًٹالاجاتاہے ۔
شبیر شاہ کے اہل خانہ کا الزام
