عظمیٰ نیوز سروس
نئی دہلی// دہلی کے محکمہ جیل خانہ جات نے جیل میں بند علیحدگی پسند رہنما شبیر احمد شاہ کی صحت کے حوالے سے سوشل میڈیا پر گردش کرنے والی افواہوں کو مسترد کرتے ہوئے کہا ہے کہ انہیں مناسب طبی امداد مل رہی ہے اور وہ فی الحال مستحکم ہیں۔ڈائریکٹر جنرل(جیل خانہ جات)کے دفتر کی طرف سے جاری کردہ ایک پریس ریلیز میں، حکام نے واضح کیا کہ شاہ، جو تہاڑ جیل میں بند ہیں، 26 جون کو صفدر جنگ ہسپتال میں پیشاب کی نالی کے نچلے حصے کی شکایت کے بعد او پی ڈی سے مشاورت کے لیے ریفر کیا گیا تھا۔ اس کے بعد اسے مزید جانچ کے لیے داخل کیا گیا۔دہلی جیلوں کے پبلک ریلیشن آفیسر اروند کمار نے کہا، اس کی تمام رپورٹس نارمل پائی گئی ہیں اور صفدر جنگ ہسپتال میں انہیں مناسب طبی علاج فراہم کیا جا رہا ہے۔
