عشرت حسین بٹ
منڈی//پونچھ ضلع کی تحصیل منڈی میں اتوار اور پیر کی درمیانی شب آنے والے شدید طوفان نے ہائی اسکول گگڑیاں کی عمارت کو زبردست نقصان پہنچایا۔ اس طوفانی رات کے دوران چلنے والی پرتشدد اور خطرناک ہواؤں نے اسکول کی چھت کو بْری طرح متاثر کیا، جس سے نہ صرف عمارت کے کچھ حصے کھل گئے بلکہ طلباء اور عملے کی حفاظت پر بھی سوالیہ نشان لگ گیا ہے۔ابتدائی جائزے کے مطابق، طوفان کی شدت کے باعث تین کلاس رومز کی چھتیں مکمل طور پر اڑ گئیں، جس کے نتیجے میں یہ کمریں تدریسی سرگرمیوں کے لئے فی الحال ناقابل استعمال ہو چکی ہیں۔ اس کے علاوہ، اسکول کے اندرونی برقی نظام کو بھی شدید نقصان پہنچا ہے، جس سے بجلی کی فراہمی، روشنی اور پنکھوں جیسے بنیادی سہولیات بھی متاثر ہو گئی ہیں۔متاثرہ حصوں میں صبح کی اسمبلی کیلئے استعمال ہونے والا شیڈ بھی شامل ہے، جہاں طلباء روزانہ جمع ہوتے تھے۔ اس شیڈ کی تباہی سے اسکول کی روزمرہ سرگرمیاں متاثر ہو گئی ہیں، اور بیرونی اجتماعات کے دوران طلباء کے لئے محفوظ و سایہ دار جگہ بھی ختم ہو گئی ہے۔صورتحال کی نزاکت کو دیکھتے ہوئے ماڈل ہائیر سیکنڈری اسکول سوجیاں کے کلسٹر ہیڈ ہرپال سنگھ نے سینئر استاد عمران خان کے ہمراہ فوری طور پر اسکول کا دورہ کیا۔ دورے کے دوران انہوں نے اسکول کے سربراہ اور عملے سے تفصیلی بات چیت کی اور متاثرہ حصوں کا معائنہ کیا۔ہرپال سنگھ نے اسکول کو پہنچنے والے شدید نقصان پر گہری تشویش کا اظہار کرتے ہوئے یقین دہانی کرائی کہ وہ اس معاملے کو فوری طور پر محکمہ تعلیم کے اعلیٰ حکام کے ساتھ اٹھائیں گے۔ انہوں نے اسکول کے بنیادی ڈھانچے کی جلد مرمت اور طلباء کی حفاظت کو یقینی بنانے کے لئے ہنگامی فنڈز کے اجراء کی ضرورت پر زور دیا۔ ان کا کہنا تھا کہ وہ ذاتی طور پر متعلقہ محکموں سے رابطہ کرکے اس عمل کو تیز کریں گے تاکہ تعلیمی سرگرمیاں جلد از جلد بحال ہو سکیں۔اسکول کی کمیونٹی نے اس دورے کو حوصلہ افزا قرار دیا اور حکام کی یقین دہانیوں پر اعتماد ظاہر کرتے ہوئے جلد عملی اقدامات کی امید ظاہر کی ہے۔
