بانہال//نیشنل کانفرنس کے رہنما اور ضلع صدر رام بن میر سجاد شاہین نے ہفتہ کے روز بانہال اسمبلی حلقہ کے مختلف برف پوش علاقوں کا دورہ کیا اور برف باری کے دوسرے دور کے بعد سڑکوں کے خستہ حال نیٹ ورک کے علاوہ بجلی اور پینے کے پانی جیسی بنیادی سہولیات کی کمی پر شدید تشویش کا اظہار کیا۔ شاہین نے ایل جی انتظامیہ پر زور دیا کہ وہ یوٹیلیٹی سروسز کی بحالی جنگی بنیادوں پر کرے تاکہ لوگوں کو بنیادی ضروریات اور دیگر ضروری خدمات فوری طور پر فراہم کی جاسکیں۔ انہوں نے کہا کہ لوگ پہلے ہی شدید سردی اور بار بار برف باری کی وجہ سے مشکلات کا شکار ہیں اور انہیں اس مشکل گھڑی میں کچھ مہلت کی ضرورت ہے۔ شاہین نے بانہال کے کچھ برف سے متاثرہ دیہاتوں کا دورہ کیا اور چملواس، کسکوٹ اور نوگام میں لوگوں سے بات چیت کی اور برف باری کے دوسرے دور کے دوران انہیں درپیش مسائل کے بارے میں خود جانکاری حاصل کی۔تحصیل کھری میں ہرنیہال کے مقام پر لنک روڈ کا ایک بڑا حصہ ڈوبنے کی وجہ سے ناچلانہ-مہو روڈ کی بندش کا حوالہ دیتے ہوئے شاہین نے متعلقہ اداروں کو سڑک کی مرمت اور بحالی میں ناکامی پر سرزنش کی کیونکہ بار بار بند ہونے کی وجہ سے لوگوں کو شدید پریشانی کا سامنا کرنا پڑتا ہے۔ انہوں نے ضلعی انتظامیہ پر زور دیا ہے کہ اس سنگین عوامی مسئلہ کا فوری نوٹس لیا جائے اور متعلقہ حکام کو ہدایت کی جائے کہ سڑک کو درست طریقے سے بحال کیا جائے کیونکہ یہ پوری تحصیل کھڑی میں مقیم مقامی آبادی کی بڑی تعداد کے لیے انتہائی اہمیت کی حامل ہے۔انہوں نے ضلعی انتظامیہ پر زور دیا کہ وہ IRCON ریلوے سمیت تمام اسٹیک ہولڈرز کی میٹنگ بلائے اور ہرنیہال میں ناچلانہ-کھری-مندکباس لنک روڈ کے ڈوبے ہوئے حصے کی مرمت میں تاخیری حربوں کے لئے غلطی کرنے والی ایجنسیوں پر ذمہ داری کا تعین کرے۔شاہین نے سیل آؤٹ لیٹس پر راشن کا مناسب ذخیرہ بھی طلب کیا تاکہ لوگوں کو تکلیف نہ ہو۔
شاہین کا بانہال کے برف باری والے علاقوں کا دورہ
