عظمیٰ مانیٹرنگ ڈیسک
دمشق//شام کے عبوری صدر احمد الشرع گزشتہ سال بشار الاسد حکومت کے خاتمے پر برسراقتدار آنے کے بعد اپنے پہلے غیر ملکی دورے پر سعودی عرب پہنچ گئے۔ سعودی عرب کے سرکاری ٹیلی ویڑن چینل الاخباریہ کی جانب سے جاری تصاویر کے مطابق سعودی حکام نے شام کے عبوری سربراہ احمد الشرع اور ان کے وزیر خارجہ اسد الشیبانی کا استقبال کیا۔نشریاتی ادارے کا کہنا ہے کہ احمد الشرع کی سعودی ولی عہد شہزادہ محمد بن سلمان سے ملاقات متوقع ہے۔احمد الشرع کو بدھ کے روز شام کا عبوری صدر نامزد کیا گیا تھا، ان کی جماعت ہئیت تحریر الشام دسمبر میں بشار الاسد کا تختہ الٹنے والی اپوزیشن فورسز کی قیادت کرہی تھی۔سعودی عرب کے شاہ سلمان اور ان کے بیٹے ولی عہد شہزادہ محمد بن سلمان نے سب سے پہلے الشرع کو ان کی سرکاری تقرری پر مبارکباد دی تھی۔شامی حکام جنگ سے تباہ حال ملک کی تعمیر نو اور اس کی معیشت کی بحالی کے لیے دولت مند خلیجی ممالک پر انحصار کر رہے ہیں۔ دمشق نے قطر کے امیر شیخ تمیم بن حماد الثانی کا استقبال کیا، جنہوں نے استحکام کو مستحکم کرنے، تعمیر نو، ترقی اور خوشحالی کے منصوبوں کے ساتھ آگے بڑھنے کے لئے شامی معاشرے کے تمام شعبوں کی نمائندگی کرنے والی حکومت تشکیل دینے کی فوری ضرورت پر زور دیا، دمشق کے مطابق فریقین نے تعمیر نو پر تبادلہ خیال کیا۔
