سرینگر/اپنی پارٹی کے سربراہ سید محمد الطاف بخاری نے آج یعنی 1931 کے شہداء کی برسی پر خراج عقیدت ادا کرنے کےلئے مزار شہدا نہ جانے پر حکمران نیشنل کانفرنس کے لیڈروں کو شدید الفاظ میں ہدفِ تنقید بنایا۔
اپنے ایک بیان میں سید محمد الطاف بخاری نے کہا، ’’یہ ستم ظریفی ہے کہ ایک جانب حکمران نیشنل کانفرنس کا دعویٰ ہے کہ وہ 13 جولائی 1931 کے شہداء کو خراج عقیدت ادا کرتی ہے، اور دوسری جانب اس جماعت جس کی پشت پر پچاس سے زائد اراکین اسمبلی ہیں، کے لیڈران نے آج مزار شہدا جاکر ان شہیدوں کو خراج عقیدت ادا کرنے کی کوشش بھی نہیں کی۔‘‘
انہوں نے مزید کہا، ’’ یہ بات قابل فہم ہے کہ حکومت اپنی خواہش نہ ہونے وجہ سے 13 جولائی کو سرکاری تعطیل کا اعلان کرنے میں ناکام رہی۔ لیکن وزیر اعلیٰ اور اُن کی کابینہ کے ساتھیوں کو آج کے دن مزاز شہدا جانے سے کون روک سکتا تھا؟ اُن کا مزار شہدا جانا نہ ہی کوئی جرم ہوتا اور نہ ہی کسی قانون کی خلاف ورزی۔‘‘
اپنی پارٹی کے رہنما نے کہا کہ کیا اب حکمران جماعت کہے کہ کہ وزیر اعلیٰ اور ان کی کابینہ کے ساتھیوں کو مززار شہدا جانے کی اجازت نہیں دی گئی۔ اگر ایسا ہے تو اس سے اس حکومت کے اختیار اور اس کی اہمیت پر سوالیہ نشان کھڑا ہوتا ہے۔ پھر لوگ ایسی حکومت سے کس چیز کی توقع رکھ سکتے ہیں؟ میں اس سوال کا جواب چیف منسٹر کے ضمیر اور نیشنل کانفرنس کے قائدین اور کارکنوں کے فیصلے پر چھوڑتا ہوں۔‘‘
ان اطلاعات پر وزیر اعلیٰ آج دلی میں تھے، سید محمد الطاف بخاری نے کہا، ’’بعض رپورٹس کے مطابق وزیر اعلیٰ نے آج یعنی یوم شہدا پر یہاں موجود رہنے اور لوگوں کے جذبات کی نمائندگی کے لیے مزار شہدا پر جانے کے بجائے، دہلی میں رہنے کا انتخاب کیا۔ میں صرف اتنا کہوں گا کہ آج کا دن ہماری تاریخ کے سب سے افسوسناک دنوں میں سے ایک ہے۔‘‘
13 جولائی کے شہداء کو کشمیر کے ہیرو قرار دیتے ہوئے سید محمد الطاف بخاری نے کہا ، ’’ملک بھر میں بہت سے لوگ شاید ان شہداء سے گہرا تعلق محسوس نہیں کر رہے ہوں گے- شاید اس لیے کہ وہ اس تاریخی حقیقت سے ناواقف ہیں کہ کشمیر میں یہ ہیروز جبر و استبداد کے خلاف کھڑے ہوئے تھے اور ان کی قربانیوں نے ہی بالآخر جموں میں جمہوریت کی بحالی کی راہ ہموار کی۔ یہ ہمیشہ ہمارے ہیرو رہیں گے۔‘‘
