عظمیٰ نیوز سروس
جموں//چیئرمین ڈی پی اے پی غلام نبی آزاد نے جموں میں ریاست اور صوبے کے عہدیداروں کی ایک اہم میٹنگ کی صدارت کیجس کے دوران انہوں نے ہم آہنگی کی اہمیت پر زور دیتے ہوئے ایک متحد اور موثر مہم کو یقینی بنانے کے لئے باقاعدہ اجلاسوں کی ضرورت پر زور دیا۔ انہوں نے کہا کہ ہمیں تمام سیٹوں پر جیت حاصل کرنے کے لئے تیاری کرنی چاہیے، کیونکہ ڈی پی اے پی ہی واحد پارٹی ہے جسے لوگوں نے قبول کیا ہے۔ انہوں نے الزام عائد کرتے ہوئے کہاکہ دوسروں نے صرف گمراہ کیا ہے اور شہریوں کی فلاح و بہبود کیلئے کام کرنے میں ناکام رہے ہیں۔سابقہ ریاستی وزیر اعلیٰ نے کہا کہ پارٹی کے قیام کے بعد ہم ایک واحد سیاسی جماعت کے طور پر کھڑے ہیں جو لوگوں کے تحفظات کے لئے زمینی لڑائیوں میں سرگرم عمل ہیں‘‘۔انہوں نے کہا کہ پارٹی کا ایجنڈا واضح ہے۔ عوامی مسائل کو سامنے لانا اور اپنی کمیونٹی میں ترقی اور امن کو فروغ دینے پر ثابت قدمی سے توجہ مرکوز کرناان کا مشن ہوگا ۔آزاد نے زور دے کر کہا کہ دوسری جماعتوں نے جھوٹے وعدوں سے عوام کو گمراہ کیا ہے جبکہ ان کی پارٹی شفافیت اور دھوکہ دہی سے بچنے کے لئے پرعزم ہے۔انھوں نے کہاکہ ’میرا واحد مقصد اس کام کو جاری رکھنا ہے جو میں نے بطور وزیر اعلیٰ شروع کیا تھا‘‘۔میٹنگ میں موجود دیگر لوگوں میں آر ایس چیب، جگل کشور شرما، ونود مشرا، چوہدری ہارون کھٹانہ، انیتا ٹھاکر، ونود کول، ارویندر سنگھ مکی، سلمان نظامی شامل تھے۔
