یواین آئی
حیدرآباد//پارٹی انحراف معاملہ میں سپریم کورٹ نے تلنگانہ اسمبلی کے اسپیکرکو ہدایت دی ہے کہ وہ نااہلی کے معاملہ میں اندرون تین ماہ فیصلہ کرے۔عدالت عظمی نے جمعرات کو تلنگانہ ہائی کورٹ کی ڈویڑن بنچ کے فیصلے کو منسوخ کرتے ہوئے ہدایت دی کہ کانگریس میں شامل ہونے والے بی آر ایس کے 10 ایم ایل ایز کی نااہلی سے متعلق درخواستوں پر اسپیکر تین ماہ کے اندر فیصلہ کریں۔ یہ درخواستیں بی آر ایس لیڈران کے ٹی راما راؤ، کوشک ریڈی اور کے پی ویویکانند نے دائر کی تھیں، جن میں اسمبلی اسپیکر سے نااہلی کی درخواستوں پر کارروائی کی اپیل کی گئی تھی۔چیف جسٹس بی آر گوائی نے کہا کہ سیاسی وفاداری بدلنے کے واقعات جمہوریت کے لیے خطرہ ہیں اور اسپیکر جب دسویں شیڈول کے تحت فیصلہ کرتے ہیں تو وہ آئینی تحفظ کے حامل نہیں ہوتے بلکہ ایک ٹریبونل کی حیثیت سے کام کرتے ہیں جس کے فیصلے عدالتی جانچ کے دائرہ میں آتے ہیں۔عدالت نے واضح کیا کہ ہائی کورٹ کی ڈویڑن بنچ نے سنگل جج کے حکم میں بلاوجہ مداخلت کی، حالانکہ اْس حکم میں وقت مقرر کرنے جیسی کوئی ہدایت بھی شامل نہیں تھی۔
