سیاحوں پر پتھراؤ کرنے کی خبر

 سرینگر//سیاحت کے وزیر تصدق حُسین مفتی نے ایک قومی اخبار میں چھپی بے بنیاد نیوز رپورٹ کا نوٹس لیتے ہوئے ذرائع ابلاغ اداروں سے اپیل کی کہ وہ زمینی صورتحال کو رپورٹ کرتے وقت ذمہ داری سے کام لیںاور صرف حقائق سامنے لائیں کیوں کہ ایک غلط نیوز رپورٹ سے وادی میں سیاحتی سیزن متاثر ہوسکتا ہے۔ ایس کے آئی سی سی میںہوٹل مالکان، ٹریول ایجنٹوں ، ٹور آپریٹروں، ہاؤس بوٹ مالکان، شکارہ والوں اور دیگر منسلک افراد کے ساتھ بات کرتے ہوئے وزیر سیاحت نے کہا کہ بلیوارڈ پر اس طرح کا کوئی بھی واقعہ پیش نہیں آیا ہے جب کہ اخبار نے اس کے برعکس خبر شائع کی۔ انہوں نے کہا کہ آج ہی تقریباً5 ہزار سیاحوں اور مقامی لوگوں نے ٹُلپ گارڈن کی سیر کی جبکہ2100 سیاحوں نے گلمرگ میں گنڈولہ کی سواری کی اور کئی دیگر مقامات کی بھی سیر کی۔انہوں نے کہا کہ یہ خبر کہ انڈونیشیا کے سیاحوں سے بھری بس پر حملہ کیا گیا صریحاً غلط اور بے بنیاد ہے۔وزیر نے کہا کہ بلیوارڈ پر پتھر بازی کا کوئی واقع پیش نہیں آیا اور ابو دھابی یاانڈونیشیا سے تعلق رکھنے والا کوئی بھی سیاح زخمی نہیں ہوا ۔تصدق مفتی نے اس نیوز رپورٹ کی مذمت کرتے ہوئے اسے انتہائی غیر ذمہ دارانہ قرار دیا۔ناظم سیاحت کشمیر محمود احمد شاہ نے بھی اس بے بنیاد رپورٹ کی مذمت کی ہے۔ انہوں نے کہا کہ سرینگر میں کسی بھی سیاح پر حملہ نہیں ہوا ہے۔ادھرتعمیرات عامہ کے وزیر نعیم اختر نے کہا ہے کہ جموں وکشمیر ملک میں محفوظ سیاحتی مقامات میں سے ایک ہے۔ انہوں نے سیاحوں سے اپیل کی ہے کہ وہ غلط رپورٹوں کی جانب توجہ نہ دیں۔انہوں نے ایک قومی اخبار کی طرف سے سیاحوں پر پتھر بازی کے واقعہ کے حوالے شایع ایک خبر کی تردید کرتے ہوئے کہا کہ اس طرح کی رپورٹ بے بنیاد ہے اور ریاست میں کہیں بھی اس طرح کا کوئی واقع رونما نہیں ہوا۔انہوں نے کہا کہ ایسا لگتا ہے کہ یہ ریاست میں سیاحتی سیزن میں خلل ڈالنے کی ایک کوشش ہے۔انہوں نے کہا کہ وہ سختی سے اس کی تردید کرتے ہیں اور ریاستی حکومت یہ معاملہ متعلقہ حکام اور پریس کونسل کے ساتھ اُٹھائے گی۔

کشمیر ایڈیٹرس گلڈ کا شدید ردعمل

سیاحتی معیشت کو زک پہنچانے کی کوشش

پولیس کی تردید