عظمیٰ نیوزسروس
ادھم پور//سب ڈویژنل مجسٹریٹ راجندر سنگھ رانا نے سب ڈویژن رام نگر کے سکول احاطوں میں موبائل فون کے استعمال پر پابندی لگانے کے لیے ایک سرکلر جاری کیا ہے۔ایس ڈی ایم نے یہ سرکلر سکولوں کا بے ترتیب معائنہ کرنے کے بعد جاری کیا جب کچھ طلباء سکول کے وقت کے دوران کلاس رومز میں موبائل فون کا استعمال کرتے ہوئے پکڑے گئے۔اس سے قبل سب ڈویژن کے کچھ مقامی لوگوں نے بھی سکولوں میں اساتذہ اور طلباء کی طرف سے موبائل فون کے غلط استعمال کی شکایات درج کرائیں جس سے خلفشار پیدا ہوتا ہے، نظم و ضبط نہیں ہوتا اور سکولوں کی مجموعی تعلیمی کارکردگی متاثر ہوتی ہے۔سرکلر میں یہ بھی کہا گیا ہے کہ کسی بھی ایمرجنسی کی صورت میں سکول کے سربراہ کا موبائل فون استعمال کیا جا سکتا ہے۔زونل ایجوکیشن آفیسروں، پرنسپلوں، ہیڈ ماسٹروں اور سکولوں کے دیگر انچارجز (نجی اور سرکاری دونوں) کو بھی مشورہ دیا گیا ہے کہ وہ سرکلر کی وسیع پیمانے پر تشہیر اور اس پر عمل درآمد کو یقینی بنائیں۔
