عظمیٰ نیوز ڈیسک
سرینگر //کرائم برانچ کشمیر نے سکمز بمنہ میں جعلی میڈیکل اسناد جمع کرکے سرکاری نوکری حاصل کرنے والے شخص کے خلاف عدالت میں چالان پیش کر دیا ہے۔ملزم کی شناخت نعمان فاروق وانی ولد مرحوم فاروق احمد وانی ساکن ابو بکر لین، عمرآباد، زینہ کوٹ سرینگر کے طور پر ہوئی ہے، جس کے خلاف ایف آئی آر نمبر 01/2023 پولیس سٹیشن کرائم برانچ ونگ میں دھوکہ دہی، جعلسازی اور جعلی دستاویزات کے استعمال سے متعلق دفعات 420، 467، 468، 471 اور 201 آر پی سی کے تحت درج کیا گیا تھا۔ایک بیان کے مطابق نعمان فاروق وانی دسمبر 2016 سے سکمز بمنہ میں بطور میڈیکل آفیسر تعینات رہا اور اس نے اپنی تقرری کے وقت میڈیکل کونسل آف انڈیا اور سٹیٹ میڈیکل کونسل کا جعلی رجسٹریشن اور میڈیکل ڈگریاں جمع کرائیں تھیں۔ حیرت انگیز طور پر وہ کوڈ19 کے دوران ہسپتال میں نوڈل آفیسر کے طور پر بھی کام کرتا رہا اور متعدد مرتبہ سروس میں توسیع بھی حاصل کرتا رہا۔تحقیقات سے یہ بھی پتہ چلا ہے کہ ملزم نے مبینہ طور پر کسی اور رجسٹرڈ ڈاکٹر کا ایم سی آئی رجسٹریشن نمبر استعمال کرکے سرکاری نوکری حاصل کی تھی۔ ان جعلی دستاویزات کی بنیاد پر وہ مسلسل سرکاری خزانے سے تنخواہیں بھی وصول کرتا رہا۔کرائم برانچ نے اس معاملے کی گہرائی سے تفتیش کے بعد کیس کو ثابت شدہ قرار دیا اور عدالت میں مکمل چالان پیش کر دیا تاکہ معاملے کی عدالتی سماعت عمل میں لائی جا سکے۔
