۔ 1000 کی موت، صرف ایک بچہ زندہ بچ گیا
عظمیٰ نیوزڈیسک
نئی دہلی//دنیا بھر میں قدرت اپنا قہر دکھا رہی ہے۔ ایک طرف جہاں افغانستان میں خوفناک زلزلے نے سینکڑوں لوگوں کی جان لے لی وہیں افریقی ملک سوڈان میں لینڈ سلائڈ نے بھاری تباہی مچائی ہے۔ سوڈان لبریشن موومنٹ نے اطلاع دی ہے کہ یہاں لینڈ سلائڈ سے کم سے کم 1000 لوگوں کی موت ہو گئی۔ یہاں تباہی اس قدر ہوئی کہ مغربی سوڈان کے ماررا پہاڑی علاقے میں پورا کا پورا گائوں ہی تباہ ہو گیا۔ یہ دارفور علاقے میں آتا ہے۔ یہاں صرف ایک بچہ ہی معجزاتی طور پر زندہ بچ سکا۔ اس وقت سوڈان میں حالات کافی خوفناک ہیں۔ عبدالواحد محمد نور کی قیادت والے گروپ نے اپنے ایک بیان میں اطلاع دیتے ہوئے کہا کہ شدید بارش کی وجہ سے لینڈ سلائڈ کا واقعہ پیش آیا، جس نے ایک پورے گائوں کو صفحہ ہستی سے مٹا دیا اور وہ مٹی میں دھنس گیا۔ دارفور علاقے پر تحریک کار گروپ کا کنٹرول ہے۔ اس گروپ نے اقوام متحدہ اور بین الاقوامی امدادی ایجنسیوں سے مدد طلب کی ہے۔ اس لینڈ سلائڈ میں ہزاروں مرنے والوں میں مرد، خواتین اور بچے سبھی شامل ہیں۔ایس ایل ایم نے ایک بیان جاری کرکے بتایا کہ مردوں، خواتین اور بچوں کی لاشیں ملبے میں دبی ہیں اور انہیں نکالنے کے لیے اقوام متحدہ اور دیگر بین الاقوامی ایجنسیوں سے مدد کی اپیل کی گئی ہے۔ بیان میں کہا گیا،’’گائوں پوری طرح سے مٹ گیا ہے جو بھی تھا، وہ ملبہ بن چکا ہے۔‘‘واضح رہے کہ سوڈان میں پہلے سے ہی جنگ چل رہی ہے۔ وہاں کے عوام جنگ سے پیدا حالات سے نپٹنے کی کوشش کر ہی رہے تھے کہ اس قدرتی افت نے انہیں اپنی زد میں لے لیا۔ یہاں لوگوں کے سامنے فاقہ کشی کی نوبت ہے۔ سوڈان کی آرمی اور ریپڈ سپورٹ فورسز کے درمیان خانہ جنگی چل رہی ہے۔ اس جنگ کے سبب دارفور علاقہ پہلے سے ہی متاثر ہے، جنگ کے نقصان سے بچنے کے لیے لوگوں نے ماررا پہاڑی علاقے میں پناہ لی ہے۔
