عظمیٰ نیوز سروس
سرینگر// جنوبی اور وسطی کشمیر میں حالیہ شدید بارشوں کے بعد جہاں وولر جھیل اور دریائے جہلم میں پانی کی سطح میں اضافہ ہوا ہے، وہیں سوپور کے نشیبی علاقوں سے متعدد خاندانوں کو احتیاطی اقدام کے طور پر محفوظ مقامات پر منتقل کیا گیا ہے۔ تاہم حکام نے برقرار رکھا کہ بارہمولہ ضلع میں فی الحال سیلاب کی کوئی تشویشناک صورتحال نہیں ہے۔ڈپٹی کمشنر بارہمولہ منگا شیرپا، جنہوں نے زمینی صورتحال کا جائزہ لینے کے لیے سوپور اور ملحقہ علاقوں کا دورہ کیا اور کہا کہ انتظامیہ گہری نظر رکھے ہوئے ہے۔انہوں نے کہا”سوپور میں پانی کی سطح 3.60 کے خطرے کے نشان کے مقابلے میں 3.15 میٹر ہے، جبکہ بارہمولہ میں یہ 4.5 میٹر کے الرٹ سطح کے مقابلے میں 3.7 میٹر ہے۔ اس سے پتہ چلتا ہے کہ سطح خطرے سے نیچے ہے، لیکن اگلے دو سے تین دن بہت اہم ہیں کیونکہ وولر جھیل اپنے 15 میٹر، کے 7 نشان کے قریب پہنچ گئی ہے” ۔انہوں نے مزید کہا کہ فلڈ کنٹرول ٹیموں کو پشتوں کو مضبوط کرنے کے لیے متحرک کر دیا گیا ہے۔ انہوں نے کہا”ہم اس بات کو یقینی بنا رہے ہیں کہ پشتے محفوظ ہیں،ہریتار میں ایک سیلابی چینل، جس میں پہلے ایک مسئلہ پیدا ہوا تھا، کو بھی درست کر دیا گیا ہے،” ۔عہدیداروں نے بتایا کہ سوپور میں چند مقامات پر معمولی پانی جمع ہونے کی اطلاع ملی ہے، حالانکہ رہائشی علاقے زیادہ تر متاثر نہیں ہوئے ہیں، سب سے زیادہ کمزور علاقوں میں رہنے والے خاندانوں کو عارضی طور پر منتقل کر دیا گیا ہے۔NHPC کی جانب سے اوڑی اور گانٹھ مولہ میں اضافی پانی چھوڑنے کے ساتھ، جہلم کا اخراج ہموار ہواہے۔
