عظمیٰ نیوزسروس
نئی دہلی// کانگریس کی سابق صدر اور رکن راجیہ سبھا سونیا گاندھی کو جمعرات کو سر گنگا رام ہسپتال سے ڈسچارج کردیا گیا۔ انہیں آج راہل گاندھی کی سالگرہ کے موقع پر ہسپتال سے چھٹی مل گئی۔ فی الحال ان کی صحت مستحکم ہے۔ ان کے فرزند اور لوک سبھا میں اپوزیشن لیڈر راہول گاندھی آج اپنی سالگرہ منارہے ہیں۔ ہسپتال کے حکام کا کہنا ہے کہ سینئر ڈاکٹروں کی ایک ٹیم کی نگرانی میں سونیا گاندھی کی صحت میں مسلسل بہتری آئی ہے۔ اسی سلسلہ کے تحت جمعرات کو ہسپتال سے ڈسچارج سے قبل انہیں ایک خصوصی ڈائٹ کی سفارش کی گئی۔حکام کا کہنا تھا کہ اگرچہ سونیا گاندھی کی صحت مستحکم ہے لیکن ڈاکٹروں نے ابھی تک یہ نہیں بتایا کہ وہ کب دوبارہ عوامی مصروفیات شروع کریں گی۔ ڈسچارج کی تاریخ علاج سے متعلق مثبت ردعمل اور مجموعی طور پر صحت کے مستحکم ہونے کے بعد طے کی گئی۔ سر گنگا رام ہسپتال کے بورڈ آف مینجمنٹ کے چیئرمین ڈاکٹر اجے سروپ نے تصدیق کی کہ معروف معدے کے سرجن ڈاکٹر سمیرن نندی اور ڈاکٹر امیتابھ یادو کی قیادت میں ایک ٹیم باقاعدگی سے سونیا گاندھی کی حالت کی نگرانی کر رہی ہے۔78 سالہ سینئر کانگریس لیڈر کو باقاعدہ طبی نگرانی میں رکھا گیا ہے۔ وہ قبل ازیں اس سال 20 فروری کو اسی اسپتال میں داخل ہوئی تھیں۔ انہیں عوامی طور پر آخری بار 13 فروری 2025 کو پارلیمنٹ میں ہوئی دیکھا گیا جب ان کی طبعیت ناساز ہوگئی تھی۔ سونیا گاندھی، جنہیں کانگریس کے سب سے طویل عرصے تک صدر رہنے کا اعزاز حاصل ہے نے بھارتی سیاست میں ایک اہم کردار ادا کیا ہے۔انہوں نے 2004 کے لوک سبھا انتخابات میں پارٹی کی قیادت کی اور یو پی اے حکومت کے قیام کی نگرانی کی، جبکہ آنجہانی وزیر اعظم ڈاکٹر منموہن سنگھ نے مسلسل دو مرتبہ وزیراعظم کے عہدہ پر فائز رہے۔ سابق وزیر اعظم آنجہانی راجیو گاندھی کی اہلیہ سونیا گاندھی بھی سات بار اتر پردیش کے رائے بریلی پارلیمانی حلقے سے اور ایک بار کرناٹک کے بیلاری سے نمائندگی کر چکی ہیں۔
