یو این آئی
نئی دہلی//راجیہ سبھا میں پیر کو سوشل میڈیا کے غلط استعمال پر شدید تشویش کا اظہار کرتے ہوئے اسے روکنے کے لیے سخت قانون بنانے کا مطالبہ کیا گیا۔بھارتیہ جنتا پارٹی کی کلپنا سینی نے وقفہ سوال کے دوران یہ مسئلہ اٹھایا اور کہا کہ سوشل میڈیا پر لوگوں کو نشانہ بنایا جاتا ہے اور ان کے خلاف نازیبا زبان استعمال کی جاتی ہے اور گالی گلوچ کی جاتی ہے۔ انہوں نے کہا کہ اس سے متاثرہ شخص کو بہت زیادہ تکلیف ہوتی ہے اور بعض اوقات وہ ڈپریشن کا بھی شکار ہو جاتا ہے۔ انہوں نے کہا کہ اس غلط استعمال کو روکنے کے لیے سخت قوانین بنانے کی ضرورت ہے۔ انہوں نے کہا کہ سوشل میڈیا کمپنیوں کو اس مواد کو ہٹانے پر مجبور کیا جائے اور لوگوں کو بھی آگاہ کرنے کی ضرورت ہے۔ انہوں نے کہا کہ ایسی حرکتوں سے معاشرے میں دشمنی اور عدم تحفظ کی فضا پیدا ہو سکتی ہے۔عام آدمی پارٹی کے وکرم جیت سنگھ ساہنی نیتبدیلی مذہب کے نام پر لوگوں کو ڈرانے اور دھمکانے کا معاملہ اٹھایا۔ انہوں نے کہا کہ یہ لوگ پیسے کمانے کے لیے لوگوں کو ڈراتے اوردھمکی دیتے ہیں۔ انہوں نے کہا کہ اس کے لیے توہم پرستی اور کالا جادو استعمال کیا جاتا ہے۔ انہوں نے مطالبہ کیا کہ اسے روکنے کے لیے قانون بنایا جائے۔
انہوں نے کہا کہ ایسی سرگرمیوں کو جرم قرار دیا جائے اور لوگوں کو استحصال سے بچایا جائے۔بی جے پی کے ڈاکٹر میدھا وشرام کلکرنی نے پونے کو تیز رفتار ٹرین سے جوڑنے کا مطالبہ کیا۔ انہوں نے کہا کہ پونے کے لیے تیجس اور راجدھانی اور دیگر تیز رفتار ٹرینیں دستیاب نہیں ہیں۔ فی الحال پونے جانے والی ٹرین میں 26 گھنٹے لگتے ہیں۔قبل ازیں ایوان نے راجیہ سبھا کے سابق رکن آنجہانی شمشیر سنگھ منہاس کو خراج عقیدت پیش کیا۔ ڈپٹی چیئرمین ہری ونش نے کہا کہ منہاس نے ایوان میں جموں و کشمیر کی نمائندگی کی تھی۔ انہوں نے کہا کہ منہاس کے انتقال سے ملک جموں و کشمیر کی ترقی کے لیے وقف ایک قابل رکن پارلیمنٹ سے محروم ہو گیا ہے۔ایوان نے ہندوستانی کرکٹ ٹیم کو آئی سی سی چیمپئنز ٹرافی جیتنے پر مبارکباد دی۔ ڈپٹی چیئرمین نے کہا کہ یہ ہندوستانی کرکٹ ٹیم کی محنت اور کھلاڑیوں کی لگن کی علامت ہے۔ انہوں نے کہا کہ اس جیت پر کھلاڑی، کوچ اور سپورٹ اسٹاف مبارکباد کے مستحق ہیں۔اس کے بعد حکومت نے منی پور میں صدر راج کے نفاذ کے بارے میں ایوان کو آگاہ کیا۔ وزیر مملکت برائے داخلہ نتیانند رائے نے 13 فروری کو منی پور میں صدر راج کے نفاذ سے متعلق دستاویزات کی کاپی ایوان میں رکھی۔
