جاوید اقبال
مینڈھر، پونچھ // گاؤں سنگیوٹ میں جموں-پونچھ قومی شاہراہ کی کٹائی کے دوران شدید لینڈ سلائیڈنگ کے نتیجے میں ایک بیوہ خاتون روبینہ کوثر زوجہ مرحوم موحد جاوید کی تمام زرعی زمین تباہ ہو گئی ہے۔ مقامی لوگوں کے مطابق لینڈ سلائیڈنگ کی یہ سنگین صورتحال ہائی وے کٹائی کے دوران مناسب حفاظتی اقدامات نہ ہونے کی وجہ سے پیدا ہوئی، جس کے باعث غریب بیوہ کا کل اثاثہ مٹی میں دفن ہو گیا۔اسی واقعہ میں موحد حافظ ولد اللہ دیتہ خان کی زمین اور رہائشی مکان کو بھی نقصان پہنچا ہے۔ گاؤں کے دیگر افراد بھی بارش اور سلائیڈنگ سے متاثر ہوئے ہیں، جن کی کھیتیاں، درخت اور دیگر املاک متاثر ہوئی ہیں۔متاثرین نے ایس ڈی ایم مینڈھر اور تحصیلدار مینڈھر سے اپیل کی کہ وہ فوراً موقع پر پہنچ کر زمینی حقائق کا جائزہ لیں۔ ساتھ ہی محکمہ مال کے متعلقہ افسران سے بھی گزارش کی گئی ہے کہ وہ موقعے پر جاکر مکمل سروے کریں اور متاثرہ بیوہ خاتون سمیت دیگر افراد کو مناسب معاوضہ فراہم کریں۔اہلِ علاقہ کا کہنا ہے کہ گاؤں سنگیوٹ میں شاہراہ کی کٹائی کے دوران کئی مقامات پر حفاظتی دیواریں یا نالیوں کا انتظام نہیں کیا گیا، جس کے نتیجے میں بارش کے دوران مٹی کھسکنے کا خطرہ بڑھ گیا ہے۔ مقامی افراد نے انتظامیہ سے مطالبہ کیا ہے کہ ایک خصوصی ٹیم تشکیل دے کر پورے علاقے کا سروے کیا جائے تاکہ جن لوگوں کی زمینیں، مکانات یا فصلیں متاثر ہوئی ہیں، انہیں سرکاری سطح پر فوری طور پر ریلیف فراہم کیا جا سکے۔عوام نے ضلع انتظامیہ سے اپیل کی ہے کہ متاثرہ افراد، خاص طور پر بیوہ خواتین اور غریب کنبوں کے ساتھ ہمدردی برتی جائے اور ان کا ازالہ فوری کیا جائے تاکہ وہ دوبارہ اپنی زندگی معمول پر لا سکیں۔
