یو این آئی
سرینگر// سرینگر سمارٹ سٹی پروجیکٹ کے تحت جمعرات کو سرینگر میں 6 ای بسوں کی ٹرائل رن انجام دی گئی۔اس موقع پر سرینگر سمارٹ سٹی پروجیکٹ کے سی ای او اطہر عامر خان نے میڈیا کے ساتھ بات کرتے ہوئے کہا کہ یہ ای گاڑیاں سرینگر سمارٹ سٹی پروجیکٹ کا ایک حصہ ہیں۔انہوں نے کہا کہ کل ایک سو گاڑیاں ہیں جو پورے شہر میں چلیں گی۔ان کا کہنا تھا کہ ان ای گاڑیوں سے پبلک ٹرانسپورٹ کا مسئلہ دور ہوگا اور لوگوں کو کافی آرام پہنچے گا۔
انہوں نے مزید کہا کہ سرخ رنگ کی یہ گاڑیاں ایکو فرنڈلی ہیں اور اس کے ساتھ ساتھ ائیر کنڈیشنڈ بھی ہیں۔سی ای او نے کہا کہ اس کے دروازوں اور دیگر اہم جگہوں پر کیمرے لگے ہوئے ہیں جس سے ڈرائیور کو گاڑی پر پورا کنٹرول حاصل ہے۔ان کا کہنا تھا کہ یہ ٹاٹا ماڈل کی سروس ہے اور ہم نے ان سے گاڑیاں خریدی نہیں ہیں بلکہ سروس کا معاہدہ کیا ہے۔اطہر عامر نے کہا کہ یہ گاڑیاں اگلے بارہ برسوں تک چلیں گی۔انہوں نے کہا کہ ہر گاڑی فی دن 2 سو کلو میٹر چلے گی اور ان کے لئے روٹس کی بھی نشاندہی کی گئی ہے۔ان کا کہنا تھا کہ ان گاڑیوں کی ڈیجیٹل بورڈنگ اور لائیو ٹریکنگ سہولیات دستیاب ہیں تاکہ مسافر کو یہ معلوم ہوسکے کہ کس وقت یہ گاڑی کہاں ہوگی۔بتادیں کہ جموں وکشمیر حکومت نے کل 2 سو ای گاڑیاں حاصل کی ہیں جن میں سے ایک سو کشمیر کے لئے ایک سو جموں کے لئے ہیں۔
