بلال فرقانی
سرینگر// جموں و کشمیرانتظامیہ نے ہائی کورٹ کے جسٹس (ریٹائرڈ) جی ڈی شرما کی سربراہی میں منیر احمد خان (سابق پولیس افسر) اور روپ لال بھارتی (سابق انڈین فاریسٹ سروس آفیسر) کی سربراہی والی سماجی اور تعلیمی طور پر پسماندہ طبقات کمیٹی کی مدت میں چھ ماہ کی توسیع کی ہے۔محکمہ قانون، انصاف اور پارلیمانی امور کی طرف سے جاری کردہ ایک حکم نامہ کے مطابق کمیشن کی مدت 19مارچ کو ختم ہورہی تھی۔۔پینل کو ایک ایسے وقت میں ایک اور توسیع دی گئی ہے جب وہ درج فہرست قبائل، درج فہرست ذاتوں اور سماجی ذاتوں (کمزور اور غیر مراعات یافتہ طبقات) میں نئے قبائل،طبقات کو شامل کرنے کے بارے میں اپنی سفارشات پیش کرنے کے بعد پسماندہ علاقہ ریزرویشن کے معاملے کی جانچ کر رہا ہے۔ جموں و کشمیر کے ریزرویشن قوانین کے تحت، آر بی اے زمرہ میں ملازمتوں اور پیشہ ورانہ کورسز میں داخلوں میں 10 فیصد ریزرویشن ہے۔ یونین ٹیریٹری انتظامیہ کے ذریعہ 19 مارچ 2020 کو اس کی تشکیل کے بعد کمیشن میں یہ تیسری توسیع ہے۔جموں و کشمیر کی حکومت کو پیش کی گئی اپنی سفارشات میں، پینل نے پہاڑیوں، پڈاریوں، کولوں اور گڈا برمن قبائل برادریوں کے لیے ایس ٹی کا درجہ اور والمیکیوں کے لیے ایس سی کا درجہ دینے کی سفارش کی ہے۔پینل نے جموں و کشمیر کی سماجی ذات کی فہرست میں 15 نئے طبقات کمیونٹیوں کو شامل کرنے کی بھی سفارش کی ہے، جن کا نام دیگر پسماندہ طبقات (او بی سی) رکھا جائے گا۔
