سری نگر میں یو اے پی اے کے تحت غیر منقولہ جائیداد ضبط:پولیس

عظمیٰ ویب ڈیسک
سری نگر/سری نگر پولیس نے غیر قانونی سرگرمیاں (روک تھام) ایکٹ (یو اے پی اے) کے تحت ملی ٹنسی سے متعلق تحقیقات کے سلسلے میں ڈیڑھ کروڑ روپیے مالیت کی غیر منقولہ جائیداد کو ضبط کر دیا۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سری نگر پولیس نے رہائشی ڈھانچے کے ساتھ 8 مرلہ اور 202 مربع فٹ اراضی پر مشتمل ایک رہائشی جائیداد کو منسلک کیا ہے جس کی مالیت تقریباً 1.5 کروڑ روپیے ہے۔انہوں نے کہا کہ میر مسجد محلہ، شالہ باغ خانیار میں واقع اور سروے نمبر 3674/1147 اور 3677/1148 کے تحت آنے والی جائیداد محمد یوسف شاہ ولد حافظ ولی اللہ شاہ کے نام پر درج ہے جو اس وقت مسعود حسین شاہ ولد محمد یوسف شاہ کے قبضے میں ہے۔
بیان میں کہا گیا یہ ضبطی غیر قانونی سرگرمیاں (روک تھام) ایکٹ (یو اے پی اے) کی متعلقہ دفعات کے تحت پولیس اسٹیشن خانیار میں درج ایف آئی آر نمبر 48/2024 کے سلسلے میں بھارتیہ نیا سنہتا (بی این ایس) کے سیکشن 109، انڈین آرمز ایکٹ کی 7/27، اور ایکٹ 16، یو اے پی، 13، 19، 13، 16، 19، 18 کے سیکشن 109 کے تحت انجام دی گئی۔انہوں نے کہا تحقیقات سے ثابت ہوا ہے کہ یہ جائیداد دہشت گردی کی سرگرمیوں سے منسلک غیر قانونی رقم سے حاصل کی گئی تھی۔ یو اے پی ایکٹ کے سیکشن 25 کے تحت کام کرتے ہوئے، غیر منقولہ جائیداد کو قانونی طریقہ کار کے بعد باضابطہ طور پر ضبط اور منسلک کر دیا گیا ہے۔
ان کا کہنا تھااٹیچمنٹ نوٹس کے ذریعے، مالک کو مذکورہ پراپرٹی کو کسی بھی طریقے سے بیچنے، لیز پر دینے یا منتقل کرنے سے منع کیا گیا ہے۔پولیس ترجمان نے بتایا کہ یہ کارروائی دہشت گردی کے ماحولیاتی نظام کو منظم طریقے سے ختم کرنے کے لیے سری نگر پولیس کی مسلسل مہم کا حصہ ہے۔انہوں نے کہا کہ دہشت گرد تنظیموں کے مالیاتی نیٹ ورکس کو نشانہ بنانے اور ان کو ناکارہ بنا کر، جموں و کشمیر پولیس کا مقصد ملک کی سلامتی اور سالمیت کے لیے نقصان دہ کارروائیوں کو روکنا ہے۔