سری لنکا میں ٹرپل سنچری مکمل کریں گے دھونی

 کولمبو/چیف سلیکٹر ایم ایس کے پرساد نے بے شک سابق ہندستانی کپتان مہندر سنگھ دھونی کو اپنی کارکردگی کو بہتر بنانے کے لیے خبردار کیا ہو لیکن اس افسانوی وکٹ کیپر بلے باز کے نشانے پر سری لنکا کے خلاف پانچ میچوں کی ون ڈے سیریز میں کئی ذاتی ریکارڈ رہیں گے ۔ہندستان اور سری لنکا کے درمیان پانچ میچوں کی سیریز 20 اگست سے شروع ہو رہی ہے ۔ پرساد نے حال ہی میں دھونی کو ایک طرح سے الٹی میٹم دیا تھا کہ انہیں اپنی کارکردگی کو بہتر بنانے کی ضرورت ہے تبھی جاکر مستقبل کیلئے ان پر غور کیا جائے گا۔دھونی پر اس سیریز میں بہتر کارکردگی کرنے کا دباؤ رہے گا کیونکہ ملک میں بہت سے نوجوان وکٹ کیپر تیزی سے ابھر کر سامنے آ رہے ہیں۔36 سالہ دھونی ون ڈے کرکٹ میں اب تک 296 میچوں میں 51.32 کی اوسط سے 9496 رنز بنا چکے ہیں اور ون ڈے کرکٹ میں سب سے زیادہ رن بنانے والے بلے بازوں کی فہرست میں 14 ویں نمبر پر ہیں ۔دھونی کے پاس اس سیریز میں اپنے ون ڈے میچوں کی ٹرپل سنچری مکمل کرنے کا موقع رہے گا۔دھونی اس سیریز کے چار میچ کھیلنے کے ساتھ ساتھ ون ڈے کرکٹ میں اپنے 300 میچ پورے کر لیں گے اور یہ کامیابی حاصل کرنے والے وہ چھٹے ہندستانی بلے باز بنیں گے ۔سچن تندولکر (463)، راہل دراوڑ (340)، محمد اظھرالدین (334)، سوربھ گانگولی (308) اور یوراج سنگھ (301) ون ڈے میں 300 میچ کھیل چکے ہیں۔ہندستانی وکٹ کیپر کے پاس ون ڈے کرکٹ میں 100 اسٹمپنگ کرنے والا پہلا کھلاڑی بننے کا بھی موقع رہے گا۔دھونی اب تک 296 میچوں میں 375 شکار کر چکے ہیں جن میں 278 کیچ اور 97 اسٹمپنگ شامل ہیں۔وہ ون ڈے کرکٹ میں سب سے زیادہ شکار کرنے کے معاملے میں سری لنکا کے کمار سنگاکارا (482)، آسٹریلیا کے ایڈم گلکرسٹ (472) اور جنوبی افریقہ کے مارک باؤچر (424) کے بعد چوتھے نمبر پر ہیں۔ون ڈے میں ابھی تک کسی بھی کھلاڑی نے 100 اسٹمپنگ نہیں کی ہے ۔سنگاکارا کے نام 404 میچوں میں 99 اسٹمپنگ کا عالمی ریکارڈ ہے ۔دھونی کو 100 کا ہندسہ پورا کرنے کے لئے تین اسٹمپنگ کی ضرورت ہے ۔دھونی تینوں فارمیٹس میں 158 اسٹمپنگ کا عالمی ریکارڈ اپنے نام رکھتے ہیں۔وہ تینوں فارمیٹ میں سب سے زیادہ شکار کرنے کے معاملے میں تیسرے مقام پر ہیں۔یو این آئی