عظمیٰ نیوز سروس
سرینگر//ڈپٹی کمشنر سرینگر ڈاکٹر بلال محی الدین بٹ نے ہفتہ کوڈسٹرکٹ لیول بینکرز ریویو کمیٹی اورڈسٹرکٹ کنسلٹیٹیو کمیٹی (DLRC؍DCC) کی میٹنگ میں ستمبر 2023 کو ختم ہونے والی سہ ماہی کیلئے مختلف حکومتی اقدامات اور اسپانسر شدہ اسکیموں کے تحت بینکوں اور دیگر مالیاتی اداروں کی کارکردگی کا جائزہ لیا۔ انہوں نے مختلف سرکاری سکیموں کے نفاذ میں بینکوں کی کارکردگی اور سالانہ کریڈٹ پلان کے تحت ترجیحی وغیر ترجیحی شعبوں کو قرض دینے میں بینکوں کی کامیابیوں کا جائزہ لیا۔اس موقع پرڈی سی نے ضلع میں کام کرنے والے تمام شعبہ جات اور بینکوں پر زور دیا کہ وہ کریڈٹ کی سہولیات اور سی ڈی ریشو کو مزید بہتر بنائیں۔ انہوں نے صد فیصد کوریج کو یقینی بنانے کے لیے ڈیجیٹل فرق کو ختم کرکے لوگوں کو مالی خواندگی اور ڈیجیٹل ادائیگی کے ماحولیاتی نظام کے بارے میں تعلیم دینے پر بھی زور دیا۔ڈی سی نے حکومت کی دیگر اسکیموں اور فلیگ شپ پروگراموں میں بہتری پر زور دیا اور لوگوں کی سماجی و اقتصادی حالت کو بہتر بنانے کے لیے خود روزگار پر توجہ مرکوز کی۔ڈی سی نے افسران سے یہ کہا کہ ہر وارڈاورپنچایت میں 15 مستفیدین کے ہدف کو یقینی بنایا جا یا۔
اس موقع پر ڈی سی کو بتایا گیا کہ ضلع سرینگر کے کل ڈپازٹس34132.49کروڑ روپئے اورایڈوانس 25268.11کروڑ روپے تھے، جو کہ رواں مالی سال کی دوسری سہ ماہی میں 74 فیصد سی ڈی ریشو ہے۔انہیںبتایا گیا کہ ضلع سرینگر میں مختلف اسکیموں کے تحت 43013 مستحقین میں 2428.39کروڑ روپے کی رقم تقسیم کی گئی ہے جس سے مالی سال 2022-23 کے دوران ضلع کے1.0 لاکھ سے زیادہ بے روزگار نوجوانوں کے لیے خود روزگار کے متوقع مواقع پیدا ہوئے ہیں۔اس کے علاوہ سرینگر میں کام کرنے والے بینکوں نے مالی سال 2023-24 کے دوران 130535 مستفیدین کے حق میں ترجیحی اور غیر ترجیحی دونوں شعبوں کے حق میں کل7111.85کروڑ روپے کا قرضہ فراہم کیا ہے۔ڈی سی کو مزید بتایا گیا کہ پرائم منسٹر مدرا یوجنا (PMMY) اسکیم کے تحت سرینگر میں کام کرنے والے بینکوں نے مالی سال 2023-24 کے دوران ضلع کے 9202 استفادہ کنندگان میں315.65کروڑ روپے تقسیم کیے ہیں۔اسی طرح پردھان منتری ایمپلائمنٹ جنریشن پروگرام (PMEGP) کے تحت کل 1860 معاملات کو منظوری دی گئی ہے اور105.23کروڑ روپے کی رقم بھی منظور کی گئی ہے۔پردھان منتری سوانیدھی اسکیموں کے نفاذ کے سلسلے میں ڈی سی کو بتایا گیا کہ ضلع کے 7341 اسٹریٹ وینڈرس میں 10۔77 کروڑ روپے تقسیم کیے گئے ہیں۔پردھان منتری جیون جیوتی بیمہ یوجنا (PMJJBY)؍پردھان منتری تحفظ بیمہ یوجنا (PMSBY) اور اٹل پنشن یوجنا (APY) سمیت سماجی تحفظ کی اسکیموں کے تحت اندراج میں حاصل ہونے والی پیش رفت کا جائزہ لیتے ہوئے، ڈی سی کو بتایا گیا کہ 181649 کے تحت رجسٹریشن کی گئی ہے۔ دسمبر 2023 تک PMSBY کے تحت 131329، PMJJBY کے تحت 40537 اور APY سکیم کے تحت 9783 شامل ہیں۔
