عظمیٰ نیوز سروس
سرینگر// حکومت نے بدھ کو ایک حکم نامہ جاری کیا جس میں انتظامی سیکرٹریوں اور یوٹی سطح کے محکموں کے سربراہوں کو 5مئی 2025 سے سرینگر کے سول سیکرٹریٹ میں اپنی موجودگی کو یقینی بنانے کی ہدایت کی گئی ہے۔وزرا ء کونسل کی میٹنگ کے بعد جاری کردہ حکومتی حکم نامے کے مطابق ’’سول سیکرٹریٹ میں سرکاری کاروبار کو مؤثر انداز میں چلانے کیلئے یہ حکم دیا جاتا ہے کہ، انتظامی سیکرٹریوں اور مرکز کے زیر انتظام علاقوں کی سطح کے محکموں کے سربراہان اپنی دستیابی کو سول سیکرٹریٹ میں یقینی بنائیں۔ تاہم وہ سول سیکرٹریٹ، جموں میں فنکشنل ضرورت کے مطابق شرکت کریں گے۔سول سیکرٹریٹ کے انتظامی محکموں کے عملے کی دستیابی کے حوالے سے انتظامات کا تعین متعلقہ محکموں کے ذریعے کیا جائے گا۔اسٹیٹ ڈپارٹمنٹ، متعلقہ انتظامی محکموں کی درخواست پر، ضرورت کے مطابق افسران/ اہلکاروں کو رہائش فراہم کرے گا۔یہ ترقی حکومت کے روایتی دربار موو پریکٹس سے ہٹنے کی تصدیق کرتی ہے۔
