! سرینگر جموں شاہراہ……..طویل ٹریفک جام اب ایک معمول

جموں سرینگر شاہراہ ، جو وادی کشمیر کو نہ صرف جموں خطہ بلکہ بیرونی دنیا سے ملانے والا واحد زمینی رابطہ ہے، پر سفر کی حالت ہر گز رنے والے دن کے ساتھ ابتر اور تکلیف دہ بنتی جارہی ہے کیونکہ کوئی ایسا دن دیکھنے کو نہیں ملتا جب اس شاہراہ پر گھنٹوں بدترین ٹریفک جام پیش نہ آتا ہو۔ اگر چہ شاہراہ کو جموں سے ادھمپور تک چہار گلیارہ بنا نےکا کام مکمل ہوا ہے اور اب اس سے آگے بانہال تک کا کام جاری ہے اور لوگ یہ امید کر رہے تھے کہ اس عمل سے شاہراہ پر سفر کا عمل نہ صرف آسان ہوگا بلکہ وقت میں بھی خاطر خواہ بچت ہوگی لیکن فی الوقت صورتحال اس سے اُلٹ ہے اور بعض اوقات طویل ترٹریفک جاموں کی وجہ سے آٹھ گھنٹے کا یہ سفر بارہ سے پندرہ گھنٹوںتک کھینچ جاتا ہے۔ حالیہ مہینوں میں ٹریفک جاموں کی بدترین صورتحال کی وجہ سے رام بن بانہال سیکٹر میں بعض اوقات چھ سے آٹھ گھنٹوں تک جام دیکھنے کو ملا ہے، جس سے مسافروں کے معمولات اور منصوبے درہم برہم ہو کر رہ جاتے ہیں۔ سرینگر سے جموں جانے والے یا وہاں سے واپس آنے والے مسافر کئی وجوہات کی بنا پہ ان مشکلات کے خوگر ہو چکے ہیں، لیکن بانہال اور رام بن کے درمیان روزانہ سفر کرنے والے ملازمین، تاجروں اور طلاب کے معمولات بُری طرح متاثرہونے کی وجہ سے انہیں روزانہ پریشانیوں کا سامنا کرنا پڑتا ہے۔ ملازمین کے وقت پر اپنی ڈیوٹی پہ نہ پہنچنے کی وجہ سے سرکاری دفاتر خاص کر صحت عامہ کے مراکز میں دور دراز علاقوں میں آئے ہوئے مریضوں کو سخت مشکلات اور تکالیف اُٹھانا پڑتی ہیں جبکہ طلبہ کے تعلیمی معمولات بھی  متاثر ہوجاتے ہیں، جو بالآخر انکے کیرئیر پر منفی اثرات کا باعث بن  جاتے ہیں اور وہ امتحانات میں خاطر خواہ کارکردگی کا مظاہرہ کرنے سے قاصر رہتے ہیں۔ اسکے علاوہ تاجروں کا ایساطبقہ جسے روزانہ سفر کرنے کی ضرورت پڑتی ہےمالی نقصانات سے دو چار ہو رہاہے لیکن جس عنوان سے ٹریفک کی آمد ور فت میں خلل ایک معمول بنتا جا رہا ہے اُ س سے ایسا لگ رہا ہے کہ انتظامیہ اسے معمول کی صورتحال تصور کرنے لگی ہے اور اسکا ازالہ کرنے کےلئے بلندبانگ دعاوی کے باوجود زمینی سطح پر کوئی کاروائی دیکھنے کو نہیں ملتی۔ اس میں کوئی شک نہیں کہ ٹریفک جاموں کےلئے شاہراہ پر گاڑیاں دوڑانے والوں کی لاپرواہانہ ڈرائیونگ اور ایک دوسرے پرسبقت لینے کی کوشش بھی ایک اہم وجہ ہے ، جس سے بعض اوقات حادثات بھی پیش آتے ہیں جس سے ٹریفک رُک جاتا ہے،لیکن سب سے بڑی وجہ شاہراہ پر جاری تعمیراتی کاموں کے بہ سبب ایک درجن سے زائد مقامات پر سڑک تنگ ہوگئی ہے، جبکہ تعمیراتی سرگرمیوں کے نتیجہ میں جابجا ملبے کے ڈھیر جمع ہو جانے کے ناطے بھی شاہراہ کئی مقامات پر سکڑ کر رہ گئی ہے اور ان مقامات پر دو طرفہ ٹریفک کی آمد ورفت سے گاڑیوں کی رفتار سست ہو جاتی ہے اور آہستہ آہستہ جام کی صورت پید اکرتی ہے۔ فی الوقت شاہراہ پر کیلا موڑ، سیری، چند ر کورٹ اور پنتھال کے مقامات پر ٹنل تعمیر کرنے کا کام جاری ہے، جوجب تیار ہونگے تو مسافت میں خاطر خواہ کمی آئیگی لیکن فی الوقت ان مقامات پر بھی جام لگنےکے بہ سبب مسافروں کے لئے گھنٹوں اپنی گاڑیوں کے اندر بیٹھ کر کسمساتے رہنے کے سوا کوئی چارہ نہیں رہتا ۔ اس میں کوئی شک نہیں کہ شاہراہ پہ سرینگر سے جموں تک جگہ جگہ ٹریفک پولیس کا عملہ ٹریفک کو کنٹرول کرنے کےلئے تعینات ہے، لیکن یہ دیکھنے میں آیا ہے کہ اُنکی زیادہ ترتوجہ معمول کی کاروائی میں جرمانے وصول کرنے پر مرکوز رہتی ہے جبکہ انکی نظروںکے سامنے جام لگ جاتے ہیں، جو گھنٹوں تک جاری رہنے کی وجہ سے ہزاروں گھنٹوں کے ایام کار کی تضیع کے بہ سبب کروڑوں روپے کا نقصان کا سبب بن جاتے ہیں۔ماضی میں یہ شاہراہ چند مخصوص مواقع کو چھوڑ کر چھوٹے بڑے ٹریفک کےلئے دو طرفہ کھلی رہتی تھی لیکن رواں برس یہ ریکاڈ قائم ہوا ہے کہ بڑی مال بردار گاڑیوں کو صرف یکطرفہ طور پر چلنے کی اجازت دی گئی ہے، جس کی وجہ سے شاہراہ پر میلوں تک ان ٹرکوں کی قطاریں کھڑی ہو کر رہ جاتی ہیں۔ شاہراہ پر ایسی گاڑیاں، جو مختلف وجوہات کی بنا پرخراب ہو جاتی ہیں یا حادثات کا شکار ہو جاتی ہیں، کو ہٹا کر شاہراہ پر ممکنہ رکاوٹ سے بچنے کےلئے میکانزم بھی انتہائی کمزور ہے۔ دور کی بات نہیں گزشتہ ہفتہ ٹنل کے اندر ایک ٹرک کو حادثہ پیش آنے کی وجہ سے بانہال اور جواہر ٹنل کے درمیان آٹھ گھنٹوں تک گاڑیوں کے پہیے جام ہو کر رہ گئے، نتیجتاً منہ تڑکے جموں سے روانہ ہوئے مسافر نصف شب کو سرینگر پہنچ گئے۔ ظاہر بات ہے کہ اُن میں سے دو ردراز علاقوں سے تعلق رکھنے والے متعدد مسافر اپنے گھروں کو بھی نہیں پہنچ پائے۔ یہ صورتحال ایک معمول بنتی جارہی ہے۔ اب جبکہ موسم سرما دستک دے رہا ہے اور سرمائی ایام میں راستہ بند ہو جانے کی وجہ سے وادیٔ کشمیر میں ضروری سپلائز متاثر ہوجاتی ہیں، لہٰذا اسکے رکھ رکھائو پر خصوصی توجہ دینے کی ضرورت ہے نیز بھاری ٹرانسپورٹ کی یک طرفہ آمد ورفت سے فی الوقت فروٹ بیرون کشمیر بھیجنے میں زبردست مشکلات درپیش ہیں، جو محنت کش کسانوں کے لئے نقصان کا سبب بن رہا ہے۔ اس سے پہلے کہ لوگوں کے اقتصادی نقصانات ناقابل تلافی بن جائیں حکومت کی جانب سے فوری اقدمات کرنے کی ضرورت ہے ۔