یو این آئی
نئی دہلی//ہندوستان اور پاکستان کے درمیان بڑھتی ہوئی کشیدگی کے درمیان وزیر اعظم نریندر مودی نے ہفتہ کوایک اعلیٰ سطحی میٹنگ میں موجودہ سرحدی صورتحال کا جائزہ لیا ۔وزیر اعظم کے دفتر نے کہا کہ وزیر اعظم کی رہائش گاہ پر ہونے والی میٹنگ میں وزیر دفاع راج ناتھ سنگھ، قومی سلامتی کے مشیر اجیت ڈوبھال، چیف آف ڈیفنس اسٹاف جنرل انیل چوہان، آرمی چیف جنرل اوپیندر دویدی، بحریہ کے سربراہ ایڈمرل دنیش کے ترپاٹھی، فضائیہ کے سربراہ ایئر چیف مارشل اے پی سنگھ اور سینئر حکام نے شرکت کی۔وزیر اعظم کے دفتر نے ایک سوشل میڈیا پوسٹ میں کہا’’وزیر اعظم نریندر مودی کی صدارت میں 7 لوک کلیان مارگ پر ایک اعلی سطحی میٹنگ ہوئی۔ میٹنگ میں وزیر دفاع راج ناتھ سنگھ، این ایس اے اجیت ڈوبھال، سی ڈی ایس جنرل انیل چوہان، مسلح افواج کے سربراہان اور سینئر حکام نے شرکت کی‘‘۔یہ اجلاس اسلئے اہمیت کا حامل سمجھا جارہا ہے جب پاکستان نے ہفتے کی صبح مختلف فوجی اور فضائی تنصیبات پر فضائی حملے کیے جنہیں ہندستانی دفاعی فورسز نے ناکام بنا دیا۔وزیر دفاع راج ناتھ سنگھ اور تینوں مسلح افواج کے سربراہان کے ساتھ گزشتہ 24گھنٹوں میں وزیر اعظم کی یہ دوسری ملاقات ہے۔ قابل ذکر ہے کہ جمعہ کو سنگھ نے مغربی سرحد پر سیکورٹی صورتحال اور ہندوستانی مسلح افواج کی آپریشنل تیاریوں کا جائزہ لینے کیلئے ایک اعلیٰ سطحی میٹنگ کی صدارت کی، جس میں جنرل چوہان، تینوں فوجوں کے سربراہان اور دفاعی سیکریٹری راجیش کمار سنگھ نے شرکت کی۔
