عظمیٰ نیوزسروس
جموں//جموں و کشمیر کانگریس کے سینئر نائب صدر رمن بھلہ نے مرکزی حکومت سے مطالبہ کیا ہے کہ سرحدی فائرنگ اور شیلنگ سے مسلسل متاثر ہونے والے سرحدی علاقوں کے رہائشیوں کو محفوظ مقامات پر پانچ مرلہ کے رہائشی پلاٹ الاٹ کیے جائیں تاکہ وہ خوف کے سائے میں زندگی گزارنے پر مجبور نہ ہوں۔انہوں نے کہا کہ پاکستان کی جانب سے آئے روز کی فائرنگ اور گولہ باری نے سرحدی علاقوں میں بسنے والے معصوم عوام کو شدید خطرات سے دوچار کر رکھا ہے، اور انہیں ایک پائیدار حل کی ضرورت ہے۔بھلا نے مرکزی حکومت سے مطالبہ کیا کہ ان متاثرہ علاقوں کے نوجوانوں کو شامل کرتے ہوئے سرحدی رہائشیوں کی ایک علیحدہ بٹالین بھی قائم کی جائے تاکہ وہ نہ صرف اپنی سرزمین کا دفاع کر سکیں بلکہ روزگار بھی حاصل ہو۔رمن بھلہ نے مزید کہا کہ حکومت کو چاہیے کہ وہ سرحدی باشندوں کی زندگیوں، تعلیم، صحت اور روزگار کے تحفظ کے لیے فوری اور سنجیدہ اقدامات کرے۔ انہوں نے حکومت پر الزام عائد کیا کہ اب تک کیے گئے وعدے محض کاغذی کارروائی تک محدود رہے ہیں اور زمینی سطح پر متاثرین کو کوئی ریلیف فراہم نہیں کیا گیا۔پہلگام حملے کے بارے میں کانگریس کے سینئر لیڈر نے کہاکہ ایک ماہ کا عرصہ گزر جانے کے باوجود بھی پہلگام حملہ آوروں کا کوئی سراغ نہیں مل پایا ہے۔انہوں نے حکومت پر زور دیا ہے کہ سرحدی پٹیوں میں اضافی سیکیورٹی فورسز تعینات کی جائیں اور سیکیورٹی گرڈ کو مزید مضبوط بنایا جائے تاکہ آنے والے امرناتھ یاترا جیسے اہم مواقع کے دوران کسی بھی ناخوشگوار واقعے سے بچا جا سکے۔
