عظمیٰ نیوزسروس
جموں//جموں و کشمیر محکمہ سیاحت اور بارڈر سیکورٹی فورس (بی ایس ایف) کے باہمی اشتراک سے جمعرات کو سچیت گڑھ سیکٹر میں ایک خصوصی بارڈر ٹورازم پروگرام کا انعقاد کیا گیا، جس کا مقصد سرحدی علاقوں میں سیاحتی امکانات کو فروغ دینا اور سرحد پر مقیم عوام کی حوصلہ افزائی کرنا تھا۔اس خصوصی موقع پر بالی ووڈ اداکارہ ہما قریشی نے بھی شرکت کی، جنہوں نے بی ایس ایف اہلکاروں، ان کے اہلِ خانہ اور سرحد پار فائرنگ سے متاثرہ مقامی رہائشیوں سے ملاقات کی اور ان کے تجربات سنے۔ انہوں نے بی ایس ایف کے جوانوں کی قربانیوں کو سراہا اور کہا کہ ان کی بے لوث خدمات ہی ملک کے امن و امان کی ضمانت ہیں۔ہما قریشی نے نوجوانوں سے خطاب کرتے ہوئے کہا، یہ میرے لیے اعزاز کی بات ہے کہ میں ان لوگوں سے مل رہی ہوں جو روزانہ اپنی جانوں کو خطرے میں ڈال کر سرحدوں کی حفاظت کرتے ہیں۔ آپ سبھی حقیقی ہیرو ہیں۔محکمہ سیاحت کے ایک اعلی افسر نے اس موقع پر کہا کہ بارڈر ٹورازم کے فروغ سے نہ صرف ان علاقوں کی معاشی حالت بہتر ہوگی بلکہ قومی یکجہتی اور عوامی شراکت داری کا پیغام بھی عام ہوگا۔ انہوں نے کہا کہ حکومت کا مقصد سرحدی علاقوں کو ترقی کے نقشے پر لانا ہے تاکہ وہاں کے لوگ بھی ملک کے مرکزی دھارے سے جڑ سکیں۔بی ایس ایف افسران نے بھی اس تقریب میں شرکت کی اور اپنے خیالات کا اظہار کرتے ہوئے کہا کہ ایسے پروگرامز نہ صرف حوصلہ افزائی کا ذریعہ ہیں بلکہ عوام اور سیکورٹی فورسز کے درمیان قربت پیدا کرنے میں بھی اہم کردار ادا کرتے ہیں۔پروگرام میں ثقافتی سرگرمیاں، مقامی ہنرمندوں کی نمائش اور فوٹو گیلری کا اہتمام بھی کیا گیا تھا، جس میں سرحدی زندگی کی جھلکیاں پیش کی گئیں۔یاد رہے کہ سچیت گڑھ سیکٹر بین الاقوامی سرحد کے قریب واقع ہے اور اکثر اوقات یہاں پاکستانی افواج کی طرف سے فائرنگ اور شیلنگ کے واقعات رونما ہوتے رہتے ہیں، جن سے مقامی آبادی متاثر ہوتی ہے۔محکمہ سیاحت نے اس بات کا عندیہ دیا کہ مستقبل میں بھی اس طرح کے پروگراموں کا انعقاد جاری رکھا جائے گا تاکہ سرحدی علاقوں کو سیاحتی نقشے پر اجاگر کیا جا سکے اور وہاں کے عوام کو ترقی کے بہتر مواقع فراہم کیے جا سکیں۔
