معراج زرگر
اعمالِ صالحہ میں سے سخاوت ایک عجیب اور انتہائی عظیم شئے ہے۔ فقط سخاوت کی بنا پر ایک معمولی شخص علماء، فضلاء، امراء، شیوخ ومعتبر پہ بھاری پڑ سکتا ہے اور بازی لے جا سکتا ہے۔ سخی ہونا فضلِ اِلٰہی ہے اور اس فضل کا کوئی جوڑ نہیں،ایثار سخاوت کی معراج ہے۔سخاوت تو یہ ہے کہ جس چیز کی انسان کو بقدر ِضرورت احتیاج نہ ہو، اُسے اﷲ کی راہ میں کسی کو دیدے اور ایثار یہ ہے کہ اپنی ضرورت کی چیز کسی دوسرے شخص کو دیدے، جبکہ وہ شخص خود اسکا سخت محتاج ہو۔
نبی کریم ؐ نے فرمایا،’’ دو خلق ایسے ہیں جن کو اﷲ تعالیٰ دوست رکھتا ہے، ایک سخاوت اور دوسری نیک خوئی، اور دو خلق ایسے ہیں جن کو وہ ناپسند کرتا ہے۔ ایک بخل اور دوسری بد خوئی‘‘۔آپ ؐ نے یہ بھی فرمایا کہ ’’ سخاوت بہشت کا ایک درخت ہے، جسکی شاخیں دنیا میں لٹک رہی ہیں،جو مرد سخی ہے وہ ان ڈالیوں میں سے ایک ڈالی کو پکڑے گا اور اس کے ذریعے سے جنت میں پہنچ جائے گا،اور بخل دوزخ کا ایک درخت ہے جس کی شاخیں دنیا میں لٹک رہی ہیں اور جو مرد بخیل ہوگا، وہ اس کی ایک شاخ پکڑے گا، اور وہ اسکو دوزخ میں پہنچادیگی۔‘‘آپؐ نے یہ بھی فرمایا کہ ’’ سخی کی تقصیر معاف فرمادو کہ جب تک وہ تنگ دست ہوتا ہے تو اﷲ اسکی دستگیری فرماتا ہے۔‘‘
آپؐ نے ارشاد فرمایا ہے کہ’’ سخی کا کھانا دوا کا حکم رکھتا ہے اور بخیل کا کھانا مرض ہے۔ سخی اﷲ کے نزدیک ہے ،وہ بہشت سے ، دوسرے لوگوں سے نزدیک ہےاور دوزخ سے دور ہے۔ بخیل مرد اﷲ سے، بہشت سے ، لوگوں سے دور اور دوزخ سے نزدیک تر ہے۔‘‘ اﷲ تعالیٰ سخی جاہل کو بخیل عابد سے زیادہ دوست رکھتا ہے اور تمام بیماریوں میں بخل سب سے بڑی بیماری ہے۔ ایک حدیث میں آیاہے کہ میری اُمت کے ابدال لوگ نماز روزے کے باعث بہشت میں نہیں جائیں گے۔ بلکہ سخاوت، پاکیزگی ٔ قلب اور اس نصیحت اور شفقت کے باعث جنت میں جائیں گے جو اُن کو خلقِ خدا سے تھی۔ایک حدیث میں آیا ہے کہ حق تعالیٰ نے موسیٰ علیہ سلام پر وحی اُتاری کہ سامری کو مت مارو کیونکہ وہ سخی ہے۔ اسی طرح ایک غزوہ میں نبی پاکؐ نے سوائے ایک اسیر کے سب کو قتل کرانے کا حکم دیا۔ حضرت علیؓ نے دریافت کیا کہ اس شخص کو قتل کیوں نہیں کیا گیا؟
آپؐ نے ارشاد فرمایا کہ جبریل امینؑ تشریف لائے اور فرمایا کہ اِس شخص کو قتل نہ کرو کیونکہ یہ سخی ہے۔
حضرت موسیٰ ؑ نے ایک دفعہ بارگاہِ ایزدی میں عرض کی کہ اے اﷲ! نبی آخر الزمانؐ کے مدارج مجھ کو دکھائیے۔ ارشاد ہوا کہ آپ ان مدارج کو نہیں پاسکتے، البتہ ان کے مدارج میں ایک درجہ میں تم کو دکھلا سکتا ہوں۔اﷲ پاک نے جب وہ درجہ موسٰیؑ کو دکھایا تو وہ اُس کے نور اور اسکی عظمت دیکھ کر غش کھاگئے۔ جب ہوش میں آئے تو عرض کیا کہ الٰہی !یہ درجہ آپؐ کو کیونکر ملا۔ حق تعالیٰ نے فرمایا، ایثار کے بدلے۔اور فرمایا کہ اے موسیٰ! ’’جو بندہ ساری عمر میں ایک بار ایثار کرے تو مجھے اُس کا مواخذہ کرنے میں شرم آتی ہےاور اس کی جگہ بہشت میں ہوگی، جہاں اس کا دل چاہیگا، وہ وہاں رہ لے گا۔‘‘
سخی اصل میں وہ شخص ہے جو بغیرکس مطلب اور غرض کے بے لوث طرز پر اپنا مال دوسرے کو دے اور یہ عام انسانوں کے بس کی بات نہیں۔کیونکہ یہ صفتِ رحمانی ہے اور عام بندوں پر گراںگذرنے والی۔ مگر جب کوئی اﷲ پاک کا بندہ رضائے الٰہی اور جذبہء ہمدردی کے تحت معاوضہ اور بدلہ نہ چاہے اور فقط اﷲ کی خوشنودی کیلئے ایسا کرے تو وہ سخی ہے۔کیونکہ بالفعل وہ اپنے مال کے انفاق کا کوئی بدل نہیں چاہتا۔اپنا مال دیکر اس کے بدلے کسی بات کی امید رکھنا معاوضہ ہوگا سخاوت نہیں۔ سخاوت اور بخل دو دریا ہیں جو ایک دوسرے کے متوازی بہتے ہیں۔سخاوت کا دریا اگرچہ میٹھے اور شیرین پانی کا سرچشمہ ہے، لیکن اس کے کنارے پر آپ کو بہت ہی کم لوگ نظر آئیں گے اور یہ خوش بخت لوگ ہیں۔اسکے برعکس بخل کے دریا کا پانی بد ذائقہ اور آلودہ ہے۔ مگر اسکے اندر اور کناروں پر لوگوں کا جمِ غفیر ہے اور یہ لوگ مادہ پرست اور بد بخت ہیں۔جب یہ دونوں دریا عارضی دنیا کی سرحدیں عبور کرکے آخرت کے بحرِ بے کراں میں داخل ہونگے تو وہاں سخیوں کی شان اور بخیلوں کا برا انجام دیدنی ہوگا۔سورۃ ابراہیم میں اﷲ کا ارشاد ہے،’’ اے سچے نبیؐ! میرے بندوں کو فرما دیجئے کہ نماز پڑھتے رہا کریں اور جو ہم نے اُن کو دیا ہے، اس میں سے خرچ کیا کریں۔اس دن کے آنے سے پہلے جب کوئی سودا نہ ہوگا اور نہ کوئی دوستی کام آئے گی۔‘‘ اس طور یہ حکمِ خداوندی ہے کہ اس کی راہ میں خرچ کیا جائے۔ حضرت ابن عباسؓ ،نبی کریمؐ سے نقل کرتے ہیں کہ’’ سخی کے گناہ سے در گذر کرو۔ کیونکہ جب وہ سخاوت کرتا ہے تو ربّ اُس کا ہاتھ تھام لیتا ہے۔‘‘ حضرت عائشہ ؓ فرماتی ہیں، ’’جنت سخی لوگوں کا گھر ہے۔‘‘حضرتِ حزیفہ ؓ فرماتے ہیں،’’ بہت سے دین میں نافرمانی کرنے والے لوگ جو اپنی معیشت میں تنگی کا شکار ہوتے ہیں، لیکن وہ سخاوت کی وجہ سے جنت میں جائیں گے۔‘‘ نبی پاکؐ نے فرمایا،’’ بیشک اﷲ تعالیٰ سخاوت فرمانے والا ہےاور سخاوت کو پسند کرتا ہے اور اچھے اخلاق کو پسند کرتا ہے اور بد اخلاق کو ناپسند کرتا ہے۔‘‘
ریاض الصالحین میں امام نووی ؒ بخاری اور مسلم کی چند روایات نقل کرتے ہیں۔ ایک روایت میں عبد اللہ ابن مسعود ؓ فرماتے ہیں کہ اللہ کے نبیؐ نے فرمایا، ’’ دو قسم کے لوگوں پر اللہ رشک کرتا ہے، ایک وہ جس کو اللہ نے مال عطا کیا ہو اور پھر اسے توفیق دی کہ وہ اس مال کو اللہ کی راہ میں لٹائے، اور دوسرا وہ جس کو اللہ نے حکمت سے نوازا اور وہ اس کے ذریعے سے درست فیصلے کرتا ہو اور لوگوں میں اسے یعنی حکمت کو پھیلاتا ہو۔‘‘ ابن مسعود ؓ سےایک روایت ہے کہ اللہ کے رسولؐ نے فرمایا ، ’’ تم میں سے ایسا کون ہے جس کو اپنے مال سے زیادہ اپنے وارث کا مال عزیزہے۔ صحابہ نے عرض کی کہ اے اللہ کے رسولؐ! ہم میں سے تو ایسا کوئی نہیں۔ ہر ایک کو تو اپنا ہی مال محبوب ہے۔ اس پر آپؐ نے فرمایا کہ’’ اس کا مال تو وہی تھا جو اس نے اپنے آگے بھیج دیا۔‘‘
امام غزالیؒ احیاالعلوم میں ایک روایت نقل کرتے ہیں کہ حضرت یحیٰ بن ذکریاؑ کی شیطان سے اُس کی اصل حالت میں ملاقات ہوگئی۔آپ ؑ نے پوچھاکہ ’’بتا آپ کو کس سے زیادہ محبت ہے اور کس کو تو سب سے زیادہ ناپسند کرتا ہے۔‘‘شیطان بولا،’’ مجھے بخیل مومن سے سب سے زیادہ محبت ہے اور فاسق سخی سب سے ناپسند ہے۔ کیونکہ مجھے ڈر ہے کہ اﷲ اس کی سخاوت کو قبول کرے گا۔‘‘ اور پھر جاتے ہوئے بولا ’’کہ اگر آپ یحیٰ نہ ہوتے تو میں یہ بات آپ کو نہ بتاتا۔‘‘ انوارالعلوم میں ایک واقعہ درج ہے کہ حضرت عمر فاروق ؓ کے دورِ مبارک میں شہر میں بھیانک آگ لگ گئی، آدھا شہر جل چکا تھا، لوگ اس پر پانی اور سرکہ ڈالتے تھے، اور آگ تھی کہ مزید بڑھ رہی تھی۔لوگ حضرت عمر فاروق ؓکی خدمت میں حاضر ہوئے اور کہا، ’’ آگ پانی سے نہیں بجھ رہی ہے۔‘‘ آپ ؓ نے فرمایا۔ ’’ یہ آگ اﷲ کی نشانیوں میں سے ہے اورتمہارے بخل کی آگ کا شعلہ ہے،اس پر پانی ڈالنا چھوڑ دو اور روٹیاں تقسیم کرو اور بخل سے توبہ کرو اور خیرات کرو۔‘‘لوگوں نے عرض کیا، ’’ ہم تو شروع سے ہی خیرات کرتے ہیں اور شروع سے ہی بہت سخی ہیں۔‘‘آپ ؓ نے فرمایا، ’’ تم خود نمائی اور شان وشوکت کی وجہ سے ایسا کرتے ہو، نہ کہ اﷲ کے خوف اور اس کی خوشنودی کیلئے ایسا کرتے ہو۔‘‘
اعمال الصالحین میں درج ہے کہ حضرت شفیق ملجی ؒ فرماتے ہیں ، ’’میں نے سات سو علماء سے یہ دریافت کیا کہ’’ عقل مند کون ہے،دولت مند کون ہے، دانا کون ہے، درویش کس کو کہتے ہیں اور بخیل کون ہے؟تو سب نے ایک ہی جواب دیا۔’’ عقل مند وہ ہے جو دنیا کو دوست نہیں رکھتا ہے اور دولت مند وہ ہے جو اﷲ کی تقسیم پر راضی رہتا ہے۔ دانا وہ ہے کہ دنیا اس کو فریب نہیں دے سکتی۔ درویش وہ ہے جس کے دل میں زیادتی کی طلب نہیں ہوتی اور بخیل وہ ہے جو اﷲ کے دئے ہوئے مال کا حق ادا نہیں کرتا۔‘‘
رمضان المبارک مواصات ، ایثار، محبت، انفاق اور سخاوت کا مہینہ ہے۔ کتنے ہی سخت دل لوگ اس مہینے کی برکت سے پگھل جاتے ہیں۔ آئیے سخاوت کریں اور سخی بنیں۔
[email protected]
