عظمیٰ نیوز سروس
جموں//بی جے پی کے سینئر لیڈر ست شرما پارٹی کے نئے پردیش صدر منتخب قرار دیئے گئے ہیں۔انہوں نے رویندر رینہ کی جگہ لی ہے جنہیں حالیہ انتخابات میں نائب وزیر اعلیٰ سریندرچودھری کے ہاتھوں شکست ہوئی ہے۔رویندر رینہ قومی ایگزیکٹیو کمیٹی کے رکن بنائے گئے ہیں۔ادھرسابق وزیر سنیل شرما کو اتوار کو لیجسلیچر پارٹی کا لیڈر منتخب کیا گیا۔ کشتواڑ ضلع کے پاڈر ناگسینی کے ایم ایل اے اسمبلی میں اپوزیشن لیڈر ہوں گے۔بی جے پی کے ترجمان نے یہاں مقننہ پارٹی کی میٹنگ کے بعد کہا کہ 47 سالہ بی جے پی لیڈر جموں و کشمیر اسمبلی میں دوسری مدت کے لیے منتخب ہوئے۔ شرما نے مرکز کے زیر انتظام علاقے میں 2022 کی حد بندی کے عمل کے بعد نئے بنائے گئے حلقہ پیڈر ناگسینی سے ایک کم فرق سے کامیابی حاصل کی۔ شرما 2014 سے 2018 تک پی ڈی پی-بی جے پی مخلوط حکومت میں وزیر مملکت رہے۔ترجمان نے کہا کہ نریندر سنگھ ڈپٹی سپیکر کے عہدے کے لیے پارٹی کے امیدوار ہوں گے۔ انتخاب کے بعد نامہ نگاروں سے بات کرتے ہوئے شرما نے کہا کہ وہ پارٹی کی مرکزی اور ریاستی قیادت کے شکر گزار ہیں کہ انہیں یہ ذمہ داری سونپی گئی ہے۔ اسمبلی میں اپنی ترجیحات کے بارے میں پوچھے جانے پر شرما نے کہا، میری تقرری ابھی ہوئی ہے۔ کل سے جنگ شروع ہو گی۔ ہمیں یہ دیکھنا ہوگا کہ دشمن کہاں چھپا ہوا ہے اور ہم اسی کے مطابق حملہ کریں گے۔
