عظمیٰ نیوزسروس
جموں//حکومت نے جمعرات کو سرے چک، پھلائیں منڈال علاقہ میں پولیس فائرنگ میں ایک نوجوان کی ہلاکت کی مجسٹریل انکوائری کے احکامات صادر کئے ہیں جبکہ پولیس نے واقعہ کا سنجیدہ نوٹس لیتے ہوئے اسمیں ملوث 2اہلکاروں کو معطل کرکے ڈی ایس پی کی سربراہی میں ایک خصوصی تحقیقاتی ٹیم تشکیل دی ہے ۔
مجسٹریل انکوائری
جمعہ کی دیر شام ضلع مجسٹریٹ جموں نےجمعرات 24جولائی 2025کو سرے چک، بھلائیں منڈال میں پیش آنے والے واقعے کی مجسٹریل انکوائری کا حکم دیا ہے۔خیال رہے کہ واقعے کے بعد، بھارتیہ نیا سنہتا (بی این ایس) کی دفعہ 109(1)، 3(5) اور آرمز ایکٹ کی دفعہ 3/27 کے تحت پولس سٹیشن ستواری میں ایف آئی آر درج کی گئی ہے۔اس واقعہ کا سنجیدگی سے نوٹس لیتے ہوئے، جیسا کہ سینئر سپرنٹنڈنٹ آف پولیس، جموں نے اطلاع دی ہے، ضلع مجسٹریٹ نے ایک مجسٹریٹ انکوائری شروع کی ہے تاکہ اس واقعہ کی وجہ سے حقائق اور حالات کی منصفانہ اور غیر جانبدارانہ جانچ کو یقینی بنایا جا سکے۔ انکوائری سب ڈویژنل مجسٹریٹ، جموں جنوبی کریں گے۔انکوائری آفیسر کو حکم کی تاریخ سے دو ہفتوں کے اندر اندر تحقیقات مکمل کرنے اور مزید ضروری کارروائی کےلئے تفصیلی رپورٹ ڈسٹرکٹ مجسٹریٹ کو پیش کرنے کی ہدایت کی گئی ہے۔
پولیس کارروائی
جموں و کشمیر پولیس نے جمعرات کو سور چک علاقے میں ایک نوجوان کے قتل کے معاملے میں ضلع سپیشل برانچ کے دو پولیس اہلکاروں کو معطل کر دیا ہے۔متوفی نوجوان کے اہل خانہ کے الزامات کی جانچ کے لیے ڈی وائی ایس پی رینک کے افسر کی سربراہی میں ایک خصوصی تحقیقاتی ٹیم (ایس آئی ٹی) بھی تشکیل دی گئی ہے۔اس سلسلے میں ایس ایس پی جموں جھوگندر سنگھ کی جانب سے جاری کئے گئے حکم نامہ میں کہاگیا ہے کہ ستواری پولیس سٹیشن میں درج ایف آئی آر 153/2025،جو 24جولائی کو پیش آئے واقعہ کے سلسلے میں درج کیاگیا،ڈسٹرکٹ سپیشل برانچ جموں سے وابستہ دو اہلکار ہیڈکانسٹیبل بلجندر سنگھ اور سلیکشن گریڈ کانسٹیبل پون سنگھ کو فوری طور معطل کردیا جاتاہے۔دونوں اہلکار ڈسٹرکٹ پولیس لائنز جموں کے ساتھ منسلک رہیں گے اور وہ اپنی تحویل میں موجود وردی اور دیگر سازوسامان ڈی پی ایل سٹور میں جمع کرائیں گے۔حکم نامہ میں مزید کہاگیا ہے کہ اس واقعہ کی محکمانہ انکوائری کیلئے ڈی ایس پی ہیڈکوارٹرس جموں تحقیقاتی آفیسر نامزد کئے گئے ہیں جو دونو ں اہلکاروںکے خلاف انکوائری کرکے اپنی رپورٹ ڈی پی او جموں کو پیش کریںگے۔
پس منظر
خیال رہے کہ 21سالہ نوجوان پولس آپریشن کے دوران اس وقت ہلاک ہو گیا جب وہ پولس سٹیشن ستواری کے دائرہ اختیار میں آنے والے سور چک علاقے میں مشتبہ منشیات فروشوں کا پیچھا کر رہے تھے۔ اس واقعہ سے ناراض متوفی کے اہل خانہ نے گورنمنٹ میڈیکل کالج جموں کے باہر احتجاج کیا اور دعویٰ کیا کہ نوجوان بے قصور تھا اور اس کا منشیات کی تجارت سے کوئی تعلق نہیں تھا۔ انہوں نے اس معاملے کی منصفانہ تحقیقات کا مطالبہ کیاتھا تاکہ اس میں ملوث افراد کو سزا دی جا سکے جسے انہوں نے “جعلی انکاؤنٹر” قرار دیاتھا۔تاہم، پولیس نے دعویٰ کیا کہ انہوں نے نوجوان کے قبضے سے 12سے15گرام ہیروئن نما مادہ برآمد کیا ہے اور اس کے ساتھی کی تلاش شروع کر دی ہے، جو فرار ہے۔عہدیداروں نے بتایا کہ منشیات کی فروخت کے بارے میں مخصوص معلومات پر کارروائی کرتے ہوئے، ڈسٹرکٹ اسپیشل برانچ کی ایک ٹیم پولس چوکی پھلائیں منڈال کے اہلکاروں کے ساتھ سیور چک میں کچھ مشتبہ منشیات فروشوں کا پیچھا کر رہی تھی، جہاں وہ فائرنگ کی زد میں آ گئے۔انہوں نے بتایا کہ کراس فائرنگ میں ایک نوجوان، جس کی شناخت محمد پرویز (21) ولد رحمت علی ساکن جاوید نگر، نکی توی کے نام سے ہوئی، زخمی ہوا، جبکہ اس کا ساتھی موقع سے فرار ہونے میں کامیاب ہوگیا۔انہوں نے بتایا کہ زخمی نوجوان کو جی ایم سی جموں منتقل کیا گیا، جہاں وہ بعد میں زخموں کی تاب نہ لاتے ہوئے چل بسا۔
ذمہ داروں کو حساب دینا چاہیے:وزیر اعلیٰ
ملوثین کیخلاف کاروائی کی جائے:میاں الطاف
عظمیٰ نیوز سروس
سرینگر// وزیر اعلیٰ عمر عبداللہ نے جموں کے نکی توی کے رہائشی محمد پرویز کے قتل کی شفاف اور وقتی جانچ کا مطالبہ کیا ہے۔اس واقعے کو “انتہائی بدقسمتی اور انتہائی افسوسناک” قرار دیتے ہوئے عمر نے کہا کہ پولیس ایجنسیوں کی طرف سے طاقت کے استعمال میں “توازن ہونا چاہیے نہ کہ اندھا دھند طریقے سے کیا جا سکتا ہے”۔ انہوں نے خبردار کیا کہ جموں و کشمیر ماضی میں اس طرح کے واقعات کی بھاری قیمت چکا ہے اور اس بار احتساب پر سمجھوتہ نہیں کیا جانا چاہیے۔عمر نے جمعرات کو جاری ہونے والے ایک بیان میں کہا، “اس واقعے کو چھپا نہیں چاہیے بلکہ اس کی شفاف اور وقت کے پابند طریقے سے تفتیش ہونی چاہیے،سچ سامنے آنا چاہیے اور ذمہ داروں کو حساب دینا چاہیے،” ۔سوگوار خاندان سے تعزیت کرتے ہوئے عمر نے مرحوم کے لواحقین کے لیے صبر جمیل کی دعا کی اور کہا کہ میں محمد پرویز کے اہل خانہ سے دلی تعزیت کرتا ہوں، اللہ انہیں جنت الفردوس عطا فرمائے۔اس واقعے نے سول سوسائٹی اور انسانی حقوق کے گروپوں میں غم و غصے کو جنم دیا ہے۔ ممبر پارلیمنٹ میاں الطاف احمد نے پولیس فائرنگ میں نوجوان کی ہلاکت پر اپنے غم و غصہ کا اظہار کیا ہے۔ میاں الطاف نے ملوث پولیس اہلکاروں کے خلاف سخت کارروائی کا مطالبہ کیا۔بیان میں کہا گیا کہ ’’یہ نوجوان کا دن دیہاڑے قتل ہے، انتظامیہ کو اس کی تحقیقات کرنی چاہیے اور قتل میں ملوث افراد سے سختی سے نمٹا جانا چاہیے۔‘‘ میاں الطاف نے ایسے واقعات کو افسوس ناک اور ناقابل قبول قرار دیا۔
