ساوتری بائی اور فاطمہ شیخ۔ہندوستان کی اولین معلمات

مختار خان
ہندوستانی معاشرے کی ترقی اوربہتری میں مردوں کے ساتھ ساتھ خواتین کا بھی نمایاں رول رہا ہے۔ مردوں کی سماجی خدمات کا تذکرہ توتاریخ میں ملتا ہےلیکن خواتین کے سماجی کار ناموں کا ذکرشاذ ونادرہی پایا جا تا ہے۔
آئیےآج ہم ایسی ہی دوعظیم خواتین سے متعارف ہوتے ہیں۔ جنہوں نے 19 ویں صدی کے نصف میں تعلیم نسواں اور پسماندہ طبقات کی ترقی کے لئے نما یاں خدمت انجام دیں ۔ ان عظیم خواتین کےنام ہیں، ساوتری بائی پھولے اور فاطمہ شیخ ۔ ساوتری بائی پھولے اور فاطمہ شیخ کو بھارت کی پہلی معلمہ ہونے کا اعزازحاصل ہے۔ ویسےمہاتما جوتی با پھولے اور ساوتری بائی پھولے کے نام سے سب واقف ہیں، لیکن فاطمہ شیخ کے متعلق بہت کم لوگ جانتے ہیں۔
ہندوستان میں تعلیم نسواں اورپسماندہ طبقہ کی بہتری کے لیے دونوں ایک ساتھ کوشاں رہیں۔ ان دونوں خواتین کا تعلق مہاراشٹرکے پونہ سے رہا۔ انیسویں صدی کی نصف دہائی میں مہاتما جوتی باپھولےاور ساوتری بائی نے پونہ سے سماجی بیداری کے مشن کی شروعات کی تھی۔ بہت جلد اس مشن سے فاطمہ شیخ بھی جڑگئیں۔ اس طرح آج سے تقریباً پونے دوسوسال پہلےسن 1848 میں بھارت میں تعلیم نسواں اوردلت طبقہ کی تعلیم کا آغاز ہوا۔
ساوتری بائی پھولے : ساوتری بائی کا جنم مہاراشٹر میں ستارا کے پاس ایک گاؤں میں ،9 جنوری 1831 کو ہوا تھا۔ سن 1840 میں ساوتری بائی اور جوتی با پھولے کی شادی ہوئی ۔ جوتی با کے والد کا پھولوں کا کاروبار تھا، جوتی با کی پرورش انکی خالہ زاد بہن سگنا بائی نےکی تھی، سگنا بائی بڑی سلجھی ہوئی خاتون تھیں ۔ وہ نہیں چاہتی تھی کہ شادی کے بعد ساوتری ان ہی کی طرح گھرکی چار دیواری میں قید ہوکررہ جائے۔ جوتی با کی تعلیم توانہوں نے جاری رکھی، ساتھ ہی ساوتری بائی کو بھی انہوں نے تعلیم کی ترغیب دی۔ جوتی با اسکول میں پڑھتے ،اُسکے بعد گھرآکرساوتری بائی اورسگنا بائی دونوں کو پڑھاتے ۔بہت جلد دونوں نے مراٹھی زبان میں مہارت حاصل کرلی۔ مراٹھی سیکھنے کے بعد انہوں نے اسکول بورڈ کا امتحان بھی پاس کرلیا، اسکے بعد ساوتری بائی نےبا قائدہ مشنری سے ٹیچر ٹرینگ حاصل کی اور بہت جلد ایک تربیت یافتہ معلمہ بن گئیں۔
ذات پات کا نظام اور پسماندہ طبقات : مہارشٹرمیں برہمن پیشواؤں کی حکومت کا خاتمہ ابھی کچھ برسوں پہلے ہی ہوا تھا۔ مراٹھی معاشرہ پراب بھی برہمنی سنسکارکی پکڑ بنی ہوئی تھی ۔ پونہ کی فضاء میں ذات پات کے نام پر بڑے پیمانے پر تفریق کی جاتی۔ یہاں خواتین اوردلتوں پر طرح طرح کی سماجی پا بندیاں بھی عائد تھیں ۔ صدیوں کی دماغی غلامی کے چلتے شعوری سطح پرمعاشرہ کی عقل و فہم کے سارے دروازے بند تھے۔ جوتی با اورساوتری جانتے تھے کہ جب تک معاشرہ میں علم کی شمع روشن نہیں کی جاتی، تب تک یہ تاریکی مٹنے والی نہیں ہے۔ اُنہوں نے من ہی من میںلڑکیوں اور دلتوں کی تعلیم کا منصوبہ بنا لیا۔ خواتین کی تعلیم کے میدان میں انکے سامنے سب سے بڑی رکاوٹ تھی کہ خاتون ٹیچر کہاں سے آئے؟ اس ذمہ داری کو نبھانےکے لئے خود ساوتری بائی آگے آئیں۔ اس طرح سن 1848 میں لڑکیوں کے لئے پونہ میں پہلی اسکول کا آغازہوا ۔
اعلیٰ طبقہ کی مخالفت : ساوتری بائی جب اپنے گھرلڑکیوں کو پڑھانے لگی تب انکے اس کام کی ،اشرفیہ طبقہ کے درمیان خوب مخالفت ہونے لگی۔ ان پرسماجی دبائو بنا یا گیا۔ یہاں تک کہ انکے والد کھنڈوجی کو سماجی بائیکاٹ جھیلنا پڑا۔ اعلیٰ ذات کے برہمن چراغ پا تھے۔ اُنہوں نے جوتی با کے والد گووند راؤ پر دباؤ بنایا۔ بیٹے بہو کے ذریعے کئےجا رہے ادھرم کے بارے میں بتایا۔ والد نے جوتی با کے سامنے اسکول کا کام بند کرنے یا گھر چھوڑکر چلے جانے کی شرط رکھی۔ جوتی با پھولے اپنے اراد ے پر اٹل رہے۔ لیکن انہیں آبائی مکان خالی کرنا پڑا۔ مکان کی تلاش میں ساوتری اورمہاتما پھولے بھٹکتے رہے، لیکن شہرمیں کوئی بھی شخص پھولے کو سہارا دینے کے لئے تیار نہ تھا۔ ہر طرف اُن کا سماجی بائیکاٹ ہو رہا تھا۔ ایسی مشکل گھڑی میں ،انہیں کے طالب علمی کے ساتھی عثمان شیخ فرشتہ بن کر سامنے آئے۔ انھوں نے جوتی با کو اپنے گھر پناہ ہی نہیں دی بلکہ اپنے باڑہ میں ہی لڑکیوں کے اسکول کا معقول انتظام بھی کروا دیا۔
فاطمہ شیخ :جوتی با پھولے کے دوست عثمان شیخ اپنی چھوٹی بہن کےساتھ پونہ کے گنج پیٹھ یعنی آج کے مومن پورہ میں ہی رہا کرتےتھے۔ایسا قیاس لگا یا جاتا ہے کہ عثمان شیخ کے خاندان کا تعلق شمالی ہندوستان سےرہا ہے ۔ غدر سے پہلے ملک میں جوافرا تفری مچی تھی، اس دوران جو قافلے شمالی ہندوستان سے مہاراشٹر کی طرف چل پڑے تھے، ایسے ہی کسی قافلہ میں عثمان شیخ کا خاندان بھی شامل تھا۔ اس دوران جو مسلمان ہجرت کر کے مہاراشٹر کی جانب مالیگاؤں، بھیونڈی اور ممبئی جیسےعلاقوں میں بڑی تعداد میں آباد ہوئے۔ ایسے ہی کسی قافلے میں عثمان شیخ کا خاندان بھی مالیگاؤں سے ہوتا ہوا پونہ پہنچا تھا۔ یہاں آ کربہت جلد ہی یہ لوگ مقامی مراٹھی تہذیب و ثقافت کے رنگ میں رچ بس گئے۔ اپنی چھوٹی بہن فاطمہ کوعثمان شیخ نے گھرپرہی تعلیم دلوائی تھی۔ فاطمہ نے اسکولی بورڈ پاس کیا تھا۔ ساوتری بائی کی رہ نمائی میں انھوں نے اب ٹیچرکی ٹرینگ مکمل کر لی ۔فاطمہ ساوتری بائی کے مشن سے جڑ گئیں۔
آخردونوں کی محنت رنگ لائیں : فا طمہ شیخ جیسی ذہین اور کمیٹڈ خاتون کی حمایت پاکر ساوتری بائی کا حوصلہ دوگنا ہو گیا۔ دونوں اب تعلیم نسواں کے لئےایک ساتھ جدوجہد کرنے لگیں ۔ شروعاتی دنوں میں سرپرست اپنی لڑکیوں کے داخلہ کے لیے راضی ہی نہ ہوتے، اس پرساوتری بائی اور فاطمہ خود گھر گھرجاتی ، بڑے پیارسے لوگوں سے مخاطب ہوتیں، انہیں تعلیم کی اہمیت بتا یا کرتیں ۔ آخرایک دن انکی محنت رنگ لائی۔ کچھ سرپرست اپنی بیٹیوں کو مدرسہ میں روانہ کرنے کے لئے راضی ہوگئے۔ پہلے پہل صرف پانچ سے چھ لڑکیاں اسکول آنے لگیں، اس طرح لڑکیوں کے پہلے اسکول کی دوبارہ شروعات ہو پائی۔
مہاراشٹرکی ترقی پسند روایت کا اثر :عثمان شیخ اور فاطمہ شیخ کا انیسوی صدی میں تعلیم نسواں جیسے سماجی کام کے لئے آگےآنا بڑی اہمیت کا حامل ہے۔ یاد رہے ساوتری بائی اورفاطمہ شیخ کی اس مہم کا آغاز 1848 میں ہوچکا تھا ۔ جبکہ سرسید احمد خان کی علی گڑھ تحریک کا آغاز 1872 کےآس پاس ہوتا ہے، یعنی ساوتری بائی اور فاطمہ شیخ نے تعلیم نسواں کی شروعات سرسید سے بیس بائیس سال پہلے کردی تھی۔
صوبہ مہارشٹر میں سنت گیانشور، تکا رام، شاہ شریف جی جیسے صوفی سنتوں کے اصلاحی کاموں کی ایک پختہ روایت رہی ہے۔ ان تحریکوں کا اثر مقامی مسلمانوں پربھی دکھائی دیتا ہے ۔ خاص طور پرایسے مسلمان جنہوں نے مقامی زبان و تہذیبی ثقافتی ورثہ سے خود کو جوڑے رکھا، یعنی جن کی مادری زبان مراٹھی رہی، اُنکے یہاں سماجی بیداری کا اثر ملک کے دیگر مسلمانوں کی بہ نسبت نمایاں نظرآتا ہے۔ مہاراشٹر کے ساحلی علاقہ کوکن اورمغربی مہاراشٹر کے مسلمانوں میں اس تحریک کےاثرکوواضح طورپردیکھا جا سکتا ہے ۔اس خطہ کے مسلمانوں میں فکری سطح پرروشن خیالی کے ساتھ ساتھ ترقی پسند رجحان بدرجہ اتم پایا جا تا ہے فاطمہ شیخ اسی روایت کی امین ہے ۔
فاطمہ شیخ اورساوتری بائی کا کمٹمنٹ : فاطمہ شیخ کے ساتھ جڑ جانے پرساوتری بائی کا کام بہت آسان ہو گیا۔ اب دونوں بستِی محلوں میں گشت لگاتیں ،عورتوں کو تعلیم کی اہمیت سے آگاہ کرواتیں، گھر کے مردوں کو سمجھاتیں۔ فاطمہ بھی مسلم بستیوں میں جاکر لڑکیوں کو تعلیم کی طرف راغب کرواتیں ۔ اعلیٰ طبقہ ساوتری بائی اورفاطمہ شیخ کی اس مہم سے خاصاناراض تھا ، اب ان کی مخالفت کی ہونے لگی ، راستہ چلتے لوگ ان پر پتّھر پھینکنے لگے، کبھی کبھی اُنکے کپڑوں پرگوبریا کیچڑ ڈال دیا جاتا۔ لیکن ساوتری بائی اور فاطمہ شیخ ثابت قدم رہیں ۔ دونوں لگن سے اپنے کام میں جٹی رہیں۔
1850سن میں فاطمہ شیخ اور ساوتری بائی نے دو تعلیمی ٹرسٹ قائم کئے۔ان کے نام تھے ’’نیٹیو فِمیل اسکول، پونے‘‘ اورساتھ ہی پسماند ہ طبقے کے لئے’’سوسائٹی فار پرموٹنگ دی ایجوکیشن آف مہاراینڈ مانگ‘‘ ۔ ان دونوں ٹرسٹ کے دائرے میں ہی دیگر ادارے بھی قائم ہوئے ، جن کی قیادت ساوتری بائی پھولے اور فاطمہ شیخ نے کی۔ مختلف علاقوں میں اس طرح کے قریباً اٹھارہ اسکول قائم کئے گئے۔جیسے جیسے اسکولوں کی تعداد بڑھنے لگی تب اساتذہ کی ڈیمانڈ بھی بڑھنے لگی۔ اسی دوران پونہ میں ہی خواتین کے لئے ایک ٹیچرز ٹریننگ سینٹرکا بھی قیام عمل میں آیا۔
فاطمہ شیخ کی قابلیت : ساوتری بائی کی غیرموجودگی میں ان اداروں کا پُورا مینیجمنٹ فاطمہ شیخ کےذمہ ہوتا۔ ایک بار ساوتری بائی شدید بیمارہوگئیں۔ اُنہیں کئی مہینوں تک دوسرے شہر ستارا میں رہنا پڑا، ایسی صورت میں فاطمہ شیخ نے بڑی پیشہ ورانہ مہارت کے ساتھ سبھی اداروں کے کام کو دیکھا۔ ساوتری بائی نے تعلیم کے ساتھ ساتھ بے سہارا عورتوں کے لئے بھی آشرم قائم کئے،جبکہ فاطمہ شیخ ہرمہم میں اُنکے ساتھ رہیں ۔فاطمہ شیخ کی قابلیت کا اندازہ اس بات سے بھی لگایا جا سکتا ہے۔ 1853 کی بات ہے۔ جوتی با کی اس تعلیمی مہم سے انگریز افسربہت خوش تھے۔ سرکار کی طرف سے جوتی با کو اُنکے اس سماجی کام کے اعزاز میں، اُنہیں کے اسکول میں ایک جلسہ منعقد کرنے کے لیے کہا گیا تاکہ مقامی لوگوں اور طلبہ کے سامنے جوتی با پھولے ، ساوتری بائی اور فاطمہ شیخ کے کا م کو سراہا جائے۔ میجر کینڈی اس جلسہ کے صدر کے طور پر مدعو تھے۔ اس موقع پر پورے جلسہ کا اہتمام اور نظامت کی ذمہ داری فاطمہ شیخ نے انجام دی ۔ جلسہ کے آخر میں میجر کینڈی نے فاطمہ شیخ کواس جلسہ کی کامیابی کے لیے خاص طور پرمبا رک باد دی، انکی قابلیت اور ذہانت کی خوب پزیرائی کرکے اُنکا حوصله بھی بڑھایا۔
فاطمہ شیخ کی وداعی تقریب : فاطمہ شیخ کے لئےساوتری بائی ایک مانیٹر کی طرح تھیں۔ ہر قدم پر وہ فاطمہ کے ساتھ بنی رہیں، انہیں فاطمہ کی شادی کی بہت فکر تھی ۔ فاطمہ کے لئے قابل لڑکے کی تلاش ہونے لگی۔ آخر ناسک کے پاس کسی مقام سے ایک قا بل لڑکے کا رشته فاطمہ کے لیے آیا۔ شادی کا آدھا خرچ خود ساوتری بائی نے اٹھایا۔ خوشی خوشی عثمان شیخ اور پھولے پریوار نے فاطمہ کووداع کیا۔ شادی کے کچھ دن بعدجب فاطمہ اپنے میکے پونہ لوٹی۔ تو فاطمہ شیخ کے اعزاز میں ساوتری بائی نے ایک الوداعی تقریب کا اہتمام کیا۔ جسکی صدارت خود ساوتری بائی نے فرمائیں ۔ اپنے صدارتی خطبہ میں ساوتری بائی پھولے نے فاطمہ شیخ کی لگن، محنت اور خواتین کی تعلیم کے لئے کی گئی انکی جدوجہد کوسب کے سامنے بڑے ہی جذباتی انداز میں پیش کیا۔نم آنکھوں سے فاطمہ کو وداعیہ دیا گیا ۔
تعلیم نسواں کے میدان میں فاطمہ شیخ کے کام کی اہمیت اس لیے بھی اہمیت کی حامل ہے ۔ آج سے قریباً دو سوبرس پہلے ایک مسلم خاتون کا اس طرح آگے آکرپسماندہ طبقہ کی بچیوں کو تعلیم کی روشنی سے رو شناس کروانااور سماج کی مخالفت سہنا،ایک انقلابی قدم ہے۔ساوتری بائی پھولے کے کام سےآج بیشتر لوگ واقف ہیں۔پونہ یونیورسٹی کا نام بھی ساوتری بائی کے نام سے منسوب ہے ۔ اس کے برعکس فاطمہ شیخ تاریخ میں گمنام ہی بنی رہی۔ دوسری طرف مسلم معاشرہ بھی فاطمہ جیسی جا نبازخاتون کواپنا آئیڈیل نہیں بنا پایا۔ حال ہی میں 2014 کو مہارشٹراسٹیٹ ایجوکیشن بورڈ ’بال بھارتی، نےاس طرف توجہ دی اور اُردو زبان کی درسی کتاب میں فاطمہ شیخ کی خدمات پرایک مضمون دیا گیا۔
ساوتری بائی پھولے اورفاطمہ شیخ نے خواتین کی فلاح وبہبودکے لئےجوعلم کی شمع روشن کی تھی ،وہ آج بھی پوری آب وتاب کے ساتھ دمک رہی ہے۔ ساوتری بائی پھولے اور فاطمہ شیخ کی کاوشوں کا ہی نتیجہ ہے کہ بھارت میں علم و ہنرکے ہرمیدان میں لڑکیاں کامیابی کے پرچم لہرا رہی ہیں۔
( رابطہ۔9867210054)
[email protected]