کولکاتہ// مرکز میں بھارتیہ جنتاپارٹی (بی جے پی) حکومت میں وزیرخزانہ اورخارجہ رہ چکے یشونت سنہا نے سنیچر کومغربی بنگال میں حکمران ترنمول کانگریس میں شمولیت اختیارکی۔
مغربی بنگال میں اسمبلی انتخابات سے قبل سنہا کی ترنمول میں شمولیت کو سیاسی میدان میں اہم مانا جارہا ہے۔ اس ریاست میں ان دنوں اسمبلی انتخابی تشہیرزوروں پر چل رہی ہے۔سنہا کے پارٹی میں شامل ہونے کے دوران راجیہ سبھا رکن ڈیریک اوبرائن اور ریاست کے وزیرپنچایت سبرت مکھرجی اور رکن پارلیمنٹ سدیپ بندیوپادھیائے موجود تھے۔
سنہا نے صحافیوں کوبتایا”جمہوریت کی طاقت اس کے ادارے ہوتے ہیں۔ آج تقریباً ہرادارہ کمزورہوگیا ہے، اس میں ملک کی عدلیہ بھی شامل ہے۔ ہمارے ملک کے لئے یہ سب سے بڑاخطرہ پیدا ہوگیا ہے“۔
بی جے پی کے سابق لیڈر سنہا اٹل بہاری واجپئی کی حکومت میں وزیرخزانہ اور خارجہ رہ چکے ہیں۔ سنہا جھارکھنڈ کے ہزاری باغ سے کئی بار رکن پارلیمنٹ رہ چکے ہیں۔ ابھی اس سیٹ سے ان کے بیٹے جینت سنہا بی جے پی کے رکن پارلیمنٹ ہیں۔
وہ وزیراعظم نریندرمودی کے اقتدارمیں آنے کے بعد سے ان کی شدید تنقید کرتے رہے ہیں۔ انہوں نے کچھ سال پہلے بی جے پی چھوڑ دی تھی اور 2020 کے اسمبلی انتخابات سے قبل بہار میں ایک سیاسی مورچہ شروع کیا تھا۔
