عظمیٰ نیوز سروس
جموں// پولیس نے بتایا کہ کٹھوعہ ضلع کے ایک گائوں کے سابق سرپنچ کو مبینہ طور پر اغوا کرنے کے الزام میں جمعہ کو 7 افراد کو گرفتار کیا گیا۔انہوں نے بتایا کہ سابق سرپنچ وریندر سنگھ عرف بنٹو کو پولیس نے زخمی حالت میں بچایا اور گورنمنٹ میڈیکل کالج اسپتال میں داخل کرایا۔پولیس نے بتایا کہ کٹھوعہ کے مرہین گائوں کے رام سرن شرما کی طرف سے درج کرائی گئی شکایت کے مطابق، ورندر سنگھ عرف بنٹو کو اس کے حلیف دشمن کملدیپ سنگھ عرف رنکو کے کہنے پر اغوا کیا گیا تھا۔پولیس نے بتایا کہ کٹھوعہ کے چن رورین گائوں سے وریندر سنگھ کو چھ افراد بندوق کی نوک پر مہندرا اسکارپیو کار میں لے گئے۔انہوں نے بتایا کہ گرفتار کیے گئے ساتوں کی شناخت کملدیپ سنگھ، گرمیت سنگھ، راجبیر سنگھ، یوگیشور سنگھ، وکرم سنگھ، دلجیت سنگھ اور ونود شرما کے طور پر کی گئی ہے۔پولیس نے بتایا کہ ان کے قبضے سے ایک پستول برآمد ہوا ہے۔
