ایم ایم پرویز
رام بن//ضلع پولیس رام بن کے سائبر سیل نے جمعرات کو 50000 روپے کے مالی فراڈ کو حل کیا۔پولیس ذرائع نے بتایا کہ رام بن پولیس کے سائبر سیل کو جاوید احمد شیخ ولد اسد اللہ شیخ سکنہ درشی پورہ، بانہال کی آف لائن شکایت موصول ہوئی تھی جس میں بتایا گیا تھا کہ اسے ایک شخص کا فون آیا۔ مذکورہ شخص نے بتایا کہ ’’میں آپ کے کزن کا بھائی ہوں اور مجھے 50000 روپے کی اشد ضرورت ہے۔شکایت کنندہ جاوید احمد نے مزید بتایا کہ اس شخص کی آواز میرے کزن کے بھائی سے ملتی جلتی ہے اور بغیر تصدیق کے اُسے 50000 روپے کی رقم منتقل کردی۔کچھ وقت کے بعد، شکایت کنندہ کو معلوم ہوا کہ وہ آن لائن مالی فراڈ کا شکار ہے۔شکایت موصول ہونے کے بعد رام بن پولیس کے سائبر سیل نے فوری طور پر کارروائی کی اور معاملے کی انکوائری شروع کی اور 50000 روپے کی دھوکہ دہی کی رقم برآمد کی جو آن لائن گھوٹالوں کے ذریعہ ہتھیائی گئی تھی۔
