یو این آئی
نئی دہلی//وزیر دفاع راجناتھ سنگھ نے کوسٹ گارڈ سے کہا ہے کہ وہ سائبر حملوں، ڈیٹا کی چوری، سگنل اور ریڈار جیمنگ جیسے غیر روایتی چیلنجوں سے نمٹنے کیلئے جدید ٹیکنالوجی کو اپنائے اور ان حالات سے نمٹنے کے لیے ہمیشہ تیار رہے۔کوسٹ گارڈ انویسٹیچر تقریب سے خطاب کرتے ہوئے سنگھ نے کہا کہ بدلتے وقت کے ساتھ کوسٹ گارڈ کو درپیش چیلنجز بھی بدل رہے ہیں، اس لیے فورس کو ہمیشہ خود کو ان سے نمٹنے کے قابل بنا کر تیار رہنا چاہیے۔ انہوں نے کہا ‘آپ سب ہمیشہ سے ان روایتی خطرات سے نمٹنے کے لیے چوکس رہے ہیں جو ہمارے سامنے برسوں سے ابھرے ہیں۔ لیکن جیسے جیسے وقت بدل رہا ہے، اب ہمیں مختلف قسم کے انتخاب کا سامنا ہے۔ جدید ٹیکنالوجی کے اس دور میں ہمیں ایسے چیلنجز کا بھی سامنا ہے جو کہ غیر روایتی ہیں۔ کوسٹ گارڈ کو سائبر حملوں، ڈیٹا کی چوری، سگنل جیمنگ، راڈار کی مداخلت اور جی پی ایس کے دھوکے جیسے کئی تکنیکی خطرات کا سامنا ہے‘‘۔انہوں نے کہا کہ اس کا مطلب یہ ہے کہ ایک طرف کوسٹ گارڈ کو روایتی خطرات کا سامنا ہے تو دوسری طرف نئے ابھرتے ہوئے خطرات بھی ہیں۔ یعنی آپ کو دونوں طریقوں سے محتاط رہنے کی ضرورت ہے۔وزیر دفاع نے کہا کہ ایک مضبوط اور خوشحال ہندوستان کا راستہ جس کا مستقبل میں تصور کیا جا رہا ہے، تمام قوتوں کو بااختیار بنانے میں ہی مضمر ہے۔ وزیردفاع نے کہا’’میں دیکھتا ہوں کہ ہماری مضبوط سیکورٹی مضبوط زراعت، مضبوط تعلیم، مضبوط صحت، مضبوط معیشت، مضبوط سائنس اور ٹیکنالوجی اور مجموعی قومی اور سماجی بااختیاریت سے جڑی ہوئی ہے۔ ہمارے خوابوں کا ہندوستان تب ہی مضبوط ہوگا جب ہمارا سیکورٹی سسٹم اور ہماری سیکورٹی فورسز مضبوط ہوں گی‘‘۔ سنگھ نے کہا کہ حکومت کوسٹ گارڈ کی کارکردگی کو بڑھانے کے لیے پابند عہد ہے۔ کوسٹ گارڈ کو مالی سال 2025-26 کیلئے 9,676کروڑ روپے مختص کیے گئے ہیں، جو پچھلے سال کے بجٹ سے 26.60 فیصد زیادہ ہے۔ یہ کوسٹ گارڈ کو جدید بنانے کی طرف بہت اہم قدم ہے۔انہوں نے کہا کہ کوسٹ گارڈ کے لیے 14 گشتی کشتیوں، 6 ایئر کشن وہیکلز، 22 انٹرسیپٹر بوٹس، 6 آف شور گشتی جہاز اور اگلی مپیڑھی کی 18 گشتی کشتیوں کی خریداری کی منظوری دی گئی ہے۔ اس سے مستقبل میں کوسٹ گارڈ کی صلاحیت اور طاقت دونوں میں اضافہ ہوگا۔وزیر دفاع نے کہا کہ خود کوسٹ گارڈ نے بھی تکنیکی ترقی پر توجہ مرکوز کی ہے اور مہی پال پور میں ڈیجیٹل کوسٹ گارڈ پروجیکٹ کی بنیاد رکھی ہے۔ ان تمام کوششوں سے کوسٹ گارڈ کو تقویت ملے گی اور یہ روایتی اور غیر روایتی خطرات سے موثر انداز میں نمٹ سکے گا۔
