یو این آئی
نئی دہلی//طلبا کی سیاست سے قومی دھارے کی سیاست میں آنے والی راشٹریہ سویم سیوک سنگھ (آر ایس ایس)کی تجربہ کار کارکن ریکھا گپتا کی قیادت والی بھارتیہ جنتا پارٹی حکومت نے جمعرات کوقومی راجدھانی علاقہ دہلی کی حکومت کی باگ ڈور سنبھالی۔دہلی کے تاریخی رام لیلا میدان میں منعقدہ ایک شاندار تقریب میں وزیر اعظم نریندر مودی اور قومی جمہوری اتحاد(این ڈی اے)کے حلقوں کے سرکردہ رہنمائوں کی موجودگی میں لیفٹیننٹ گورنر وی کے سکسینہ نے گپتا اور ان کے ساتھی وزرا کو عہدے اور رازداری کا حلف دلایا۔ گپتا شالیمار باغ حلقے سے بی جے پی کی ممبر اسمبلی منتخب ہوئی ہیں۔ گپتا کے بعد عام آدمی پارٹی کے قومی کنوینر اور سابق وزیر اعلیٰ اروند کیجریوال کو شکست دے کر نئی دہلی اسمبلی سیٹ سے ممبر اسمبلی منتخب والے پرویش صاحب سنگھ ورما نے وزیر کے عہدے کا حلف لیا۔ اس کے بعد آشیش سود، منجندر سنگھ سرسا، رویندر اندراج سنگھ، کپل مشرا اور پنکج کمار سنگھ نے وزیر کے طور پر حلف لیا۔رام لیلا گرانڈ میں تین اسٹیج سجائے گئے۔ بائیں اسٹیج پر مختلف مذاہب کے مذہبی پیشوا اور کئی نامور بزرگ بیٹھے تھے۔ وزیراعلیٰ اور وزرا کو حلف دلانے کے درمیانی اسٹیج پر انتظامات کئے گئے تھے اور اس اسٹیج پر وزیراعظم مودی، مرکزی وزیر داخلہ امت شاہ، وزیر دفاع راج ناتھ سنگھ سمیت مودی کابینہ کے دیگر وزرا، بی جے پی کے قومی صدر جے پی نڈا، دہلی بی جے پی کے صدر وریندر سچدیوا، بی جے پی اور این ڈی اے کی حکومت والی ریاستوں کے وزرائے اعلیٰ اور نائب وزیر اعلیٰ موجود تھے۔آسام کے وزیراعلی ہیمنت وشو سرما، گوا کے وزیراعلیٰ پرمود ساونت، ہریانہ کے وزیراعلیٰ نائب سنگھ سینی، مدھیہ پردیش کے وزیراعلیٰ موہن یادو اور نائب وزیراعلیٰ راجندر شکلا، چھتیس گڑھ کے وزیراعلیٰ وشنو دیو سائی، راجستھان کے وزیراعلیٰ بھجن لال شرما، آندھرا پردیش کے وزیراعلیٰ این چندرابابو نائیڈو، نائب وزیراعلیٰ پون کلیان ، مہاراشٹر کے وزیراعلیٰ دیوندر فرنویس ، نائب وزیراعلیٰ اجیت پوار، اتر پردیش کے نائب وزرائے اعلیٰ کیشو پرساد موریہ اور برجیش پاٹھک، بہار کے نائب وزیر اعلیٰ وجے کمار سنہا، شمال مشرق کے رہنما، دہلی کے تمام اراکین پارلیمنٹ، میئر اور دہلی کے مرکزی وزرا اور جنتا دل یونائیٹڈ کے لیڈر راجیو رنجن سنگھ عرف للن سنگھ اور دیگر اہم شخصیات نے شرکت کی۔قومی ترانے سے حلف برداری کی تقریب کا آغاز ہوا۔ اس کے بعد دہلی کے چیف سکریٹری دھرمیندر کمار نے مرکزی وزارت داخلہ کا نوٹیفکیشن پڑھ کر سنایا، جس میں صدر جمہوریہ دروپدی مرمو نے ریکھا گپتا کو وزیر اعلیٰ اور چھ دیگر اراکین اسمبلی کو وزیر اعلیٰ مقرر کرنے کی اجازت دی تھی۔سوشل میڈیا پلیٹ فارم ٹویٹر پر گپتا کو وزیر اعلیٰ بننے پر مبارکباد دیتے ہوئے مودی نے لکھا ’’ ریکھا گپتا جی کو دہلی کی وزیر اعلیٰ کے طور پر حلف لینے پر مبارکباد۔ وہ نچلی سطح سے اٹھی ہیں، کیمپس کی سیاست، ریاستی تنظیم، میونسپل کارپوریشن انتظامیہ میں سرگرم رہی ہیں اور اب ایم ایل اے اور وزیر اعلیٰ بھی ہیں۔ مجھے یقین ہے کہ وہ دہلی کی ترقی کیلئے اپنی پوری طاقت سے کام کریں گی۔ ایک کامیاب مدت کیلئے میری نیک خواہشات۔حلف برداری کے بعد وزیر اعلیٰ گپتا نے کہا کہ ان کی حکومت انتخابات کے دوران دہلی کے عوام سے پارٹی کی طرف سے کئے گئے وعدوں کو پورا کرے گی۔ انہوں نے کہا کہ ہماری حکومت کرپشن کو ہر گز برداشت نہیں کرے گی اور کرپشن کرنے والوں کے خلاف سخت کارروائی کی جائے گی۔ گپتا دہلی کی چوتھی خاتون وزیر اعلیٰ ہیں اور اس وقت مغربی بنگال کی وزیر اعلیٰ ممتا بنرجی کے بعد ریاست کی سربراہی کرنے والی دوسری خاتون ہیں۔