ریزرو بینک آف انڈیا کا بڑا فیصلہ پالیسی ریٹ میں کمی، گھر اور کار قرض سستے ہوں گے

 عظمیٰ نیوز سروس

ممبئی//ریزرو بینک آف انڈیا کی مانیٹری پالیسی کمیٹی (ایم پی سی) نے مستقبل میں افراط زر کی نرمی کو ذہن میں رکھتے ہوئے ترقی کی رفتار کو تیز کرنے کے مقصد سے پالیسی ریٹ بالخصوص ریپو ریٹ میں مسلسل تیسری بار نصف فیصد کی کٹوتی کرنے کا فیصلہ کیا، جس سے گھریلو قرضوں اور گاڑیوں اور دیگر قرضے سستے ہو جائیں گے۔ آر بی آئی فروری 2025 سے ریپو ریٹ میں ایک فیصد کی کٹوتی کرچکا ہے۔ریزرو بینک کے گورنر سنجے ملہوترا نے ایم پی سی کی 55ویں میٹنگ اور ایم پی سی کی رواں مالی سال کی دوسری تین روزہ دو ماہی میٹنگ میں لیے گئے فیصلوں کے بارے میں مطلع کرتے ہوئے کہا کہ پچھلے دو بار 0.25فیصد اور 0.25 فیصد کی ریپو ریٹ میں کمی کی گئی تھی اور اب اس میں 0.50فیصد کی کٹوتی کی جا رہی ہے جو فوری اثر سے نافذ ہوجائے گا۔ انہوں نے کہا کہ سسٹم میں لیکویڈیٹی بڑھانے کے مقصد سے کیش ریزرو ریشو (سی آر آر) کو مرحلہ وار انداز میں ایک فیصد کم کیا جا رہا ہے، جس سے سسٹم میں لیکویڈیٹی میں 2.50لاکھ کروڑ روپے کا اضافہ ہوگا۔ اس کٹوتی کے بعد سی آر آر چار فیصد سے کم ہو کر تین فیصد ہو جائے گا۔انہوں نے کہا کہ ایم پی سی نے لکویڈیٹی ایڈجسٹمنٹ سہولت کے تحت پالیسی ریپو ریٹ کو 50 بیسس پوائنٹس سے کم کر کے 5.5 فیصد کرنے کا فیصلہ کیا ہے۔ یہ فوری اثر سے نافذ العمل ہوگا۔ نتیجے کے طور پر، اسٹینڈنگ ڈپازٹ فیسیلٹی (ایس ٹی ایف) کی شرح کو 5.25 فیصد تک ایڈجسٹ کیا جائے گا۔ مارجنل اسٹینڈنگ فیسیلٹی (ایم ایس ایف) کی شرح اور بینک ریٹ کو 5.75 فیصد پر ایڈجسٹ کیا جائے گا۔