عظمیٰ نیوز سروس
جموں// وزیر اعلیٰ عمر عبداللہ نے کہا ہے کہ ریزرویشن کا معاملہ اگلے کابینہ اجلاس میں منظور کیا جائیگا۔ انہوں نے کہا کہ ریاستی بحالی کے مسئلے کو سپریم کورٹ میں لیجانے پر غور ہورہا ہے۔
ریزر ویزشن
دربار موقعہ پر نامہ نگاروں سے بات چیت کرتے ہوئے وزیر اعلیٰ نے کہاکہ جہاں تک ریزرویشن کا تعلق ہے انہوں نے کچھ بھی چھپایا نہیں ہے۔ انہوں نے زور دے کر کہا کہ ان کی حکومت ریزرویشن کی سطح کو سپریم کورٹ کے فیصلے کے مطابق لانے کا ارادہ رکھتی ہے، جس میں کہا گیا ہے کہ 50 فیصد سے زیادہ ریزرویشن نہیں ہونا چاہیے۔انہوں نے کہا”کابینہ کی ذیلی کمیٹی نے اپنی رپورٹ مکمل کر لی ہے۔ اسے اگلے اجلاس میں کابینہ کی منظوری کے بعد لیفٹیننٹ گورنر کو بھیج دیا جائے گا،”۔ جموں و کشمیر میں ریزرویشن ایک بڑا مسئلہ بن گیا ہے جس کے بعد مرکزی حکومت کی طرف سے ریزرو کیٹیگری میں مزید کمیونٹیز کو شامل کرنے اور یونین ٹیریٹری میں پچھلے پانچ سالوں کے دوران کوٹہ کو بڑھایا گیا ہے۔جموں و کشمیر میں ریزرویشن کوٹہ کو پچھلے سال 70 فیصد کرنے اور پہاڑیوں اور دیگر قبائل کے لیے علیحدہ 10 فیصد ریزرویشن متعارف کرانے اور او بی سی (دیگر پسماندہ طبقات)کوٹہ کو آٹھ فیصد کرنے کے اعلانات کے بعد مرکز کے اقدام پر اعتراضات بڑھتے جارہے ہیں۔انہوں نے کہا، “اپوزیشن نے ریزرویشن کے معاملے پر تب ہی بات کرنا شروع کی جب نیشنل کانفرنس نے اسے اپنے انتخابی منشور میں شامل کیا، ورنہ اس موضوع پر کون بات کر رہا تھا؟ ۔ انہوں نے کہا’’میری حکومت ایک سال پہلے بنی ، لیکن ریزرویشن کا مسئلہ اس سے پہلے ہی شروع ہوا” ۔
دربار مو
عمر عبداللہ نے کہا کہ ان کی حکومت نے سابقہ ریاست کے جڑواں دارالحکومتوں کے درمیان خلیج ختم کرنے کے لیے پرانی ‘دربار مو’ روایت کو بحال کیا “۔ عبداللہ نے کہا کہ کچھ لوگ ہمیشہ جموں اور سرینگر کے درمیان دراڑ پیدا کرنے کی کوشش کرتے ہیں اور سیاسی فائدے کے لیے جموں بمقابلہ کشمیر کو بڑھاوا دیتے ہیں۔انہوں نے کہا”ہم فاصلے کو دور کرنا چاہتے ہیں” ۔عبداللہ نے کہا کہ انہوں نے منتقلی کو بحال کرکے اپنی ذمہ داری پوری کی، اور امید ظاہر کی کہ جموں و کشمیر کی معیشت کو ان کے فیصلے سے فائدہ پہنچے گا۔وزیر اعلیٰ نے کہا”سب سے اہم بات یہ ہے کہ ہر چیز کو پیسوں میں نہیں تولا جانا چاہیے۔ ‘دربار مو’ کو پیسہ بچانے کے لیے روک دیا گیا تھا، کچھ چیزیں پیسے سے زیادہ ہوتی ہیں، کیونکہ اس میں جموں اور کشمیر کے دو خطوں کے درمیان جذبات اور اتحاد شامل ہے، یہ روایت خطوں کو متحد کرنے کا “سب سے بڑا طریقہ” ہے۔انہوں نے کہا’دربار مو’ کو روکنے سے دونوں خطوں کا اتحاد متاثر ہوا، اور “ہم نے اس غلطی کو درست کرنے کی کوشش کی”۔وزیر اعلی نے کہا” روایت کو بحال کرنے سے جموں کی معیشت کو فائدہ ہوگا‘‘ ۔عمر نے مزید کہا کہ جموں میں حکومت کا پرجوش استقبال اس فیصلے سے وابستہ عوامی جذبات کا ثبوت ہے۔ “آپ نے آج دیکھا ہوگا ، جو پیاراور استقبال ہمیں ملا، زبردست ردعمل کی وجہ سے ہمیں پہنچنے میں ایک گھنٹہ لگا، جموں کو اس وقت نقصان اٹھانا پڑا جب دربار موو کو بند کیا گیا، اور تاجروں نے بار بار تشویش کا اظہار کیا،” ۔انہوں نے زور دے کر کہا کہ اس اقدام سے نہ صرف کاروباری برادری کو مدد ملے گی بلکہ دونوں خطوں کے درمیان جذباتی اور ثقافتی تعلقات بھی مضبوط ہوں گے۔
ملازمین
ملازمین کی نقل و حرکت کے انتظامات کے بارے میں بات کرتے ہوئے، عبداللہ نے کہا کہ چونکہ یہ اقدام کچھ عرصے بعد ہو رہا ہے، حکومت کو کسی بھی کوتاہی کو دور کرنے میں کچھ دن لگیں گے۔انہوں نے کہا”ہمیں دفاتر کو منظم کرنا ہے، ملازمین کو رہائش فراہم کرنا ہے، اور دیگر تمام انتظامات کرنے ہیں، اس کے لیے ان تمام چیزوں کو دیکھنے کے لیے ایک ایڈیشنل چیف سیکریٹری کی سربراہی میں افسران کی ایک خصوصی ٹیم تشکیل دی گئی ہے، مجھے پوری امید ہے کہ شالین کابرا اور ان کی ٹیم ملازمین کے تمام مسائل کو حل کرے گی،” ۔عبداللہ نے کہا کہ ان کی حکومت کو صرف ایک سال ہوا ہے اور اس نے وعدہ کیا ہے کہ “حالات بہتر ہوتے رہیں گے”۔
ریاستی بحالی
وزیر اعلیٰ عمر عبداللہ نے کہا ہے کہ نیشنل کانفرنس سے وابستہ قانونی اور آئینی ماہرین پارٹی کے سپریم کورٹ کے مقدمے کی کارروائی میں شامل ہونے کے امکان کا جائزہ لے رہے ہیں جو جموں و کشمیر کی ریاستی حیثیت کی بحالی سے متعلق ہے۔ یہ پوچھے جانے پر کہ نیشنل کانفرنس ریاستی حیثیت کی بحالی سے متعلق سپریم کورٹ کیس میں حصہ لینے پر غور کر رہی ہے، انہوں نے کہا کہ پارٹی ابھی بھی اس کے بارے میں سوچ رہی ہے۔عبداللہ نے کہا کہ “ہمیں عدالت میں جانے سے پہلے فوائد اور نقصانات دونوں کو مدنظر رکھنا ہوگا، اگر ہمیں لگتا ہے کہ عدالت جانے کا کوئی فائدہ ہے تو ہم جائیں گے، ہمارے بہت سے لوگ جو قانون اور آئین سے بخوبی واقف ہیں، اس کو دیکھ رہے ہیں، ان کی رائے اور مشورہ ہمارے اگلے اقدام کا فیصلہ کرے گا،” ۔
ضمنی انتخاب
انہوں نے کہا کہ پارٹی 11 نومبر کو ہونے والے ضمنی انتخابات میں بڈگام اور نگروٹہ دونوں اسمبلی سیٹوں کو جیتنے کے لیے لڑ رہی ہے۔انہوں نے کہا”ایک ہماری اپنی سیٹ (بڈگام)تھی اور دوسری وہ تھی جسے ہم پچھلے الیکشن میں ہارے تھے، ہمیں امید ہے کہ نگروٹہ میں اس بار ہماری کارکردگی بہتر رہے گی کیونکہ بی جے پی نے ایک بار پھر ثابت کر دیا ہے، جو میں بار بار کہہ رہا ہوں، کہ اسے خاندانی حکمرانی سے کوئی مسئلہ نہیں ہے، وہ خاندانی حکمرانی کو پسند کرتے ہیں اگر ان کی پارٹی میں ہے ،لیکن اسے صرف بی جے پی کے خلاف خاندانوں کا معاملہ ہے‘‘۔
قیدی
پی ڈی پی سربراہ محبوبہ مفتی کی جانب سے یونین ٹیریٹری سے باہر کی جیلوں میں بند کشمیری قیدیوں کی واپسی کے لیے ہائی کورٹ میں درخواست دائر کرنے پر عبداللہ نے کہا کہ جب سے انہوں نے یہ قدم اٹھایا ہے، سب کو عدالتی حکم کا انتظار کرنا ہوگا۔عبداللہ نے کہا کہ”اب آپ اسمبلی میں اس معاملے پر بحث نہیں کر سکتے کیونکہ آپ نے (عدالت سے رجوع کر کے)معاملے کو بحث کے دائرے سے باہر دھکیل دیا ہے۔ جب وہ (پی ڈی پی قانون ساز)اسمبلی میں اس مسئلے کو اٹھانے یا اس پر قرارداد لانے کی کوشش کریں گے، تو سپیکر انہیں بتائیں گے کہ یہ معاملہ زیر سماعت ہے، کب تک زیر سماعت رہے گا، ہمیں نہیں معلوم ، اس لیے، سب کو انتظار کرنا پڑے گا۔
سیلاب
سیلاب پیکیج پر، وزیر اعلیٰ نے کہا کہ ان کی حکومت نے نقصان کا اندازہ لگانے کے بعد مرکز کو ایک میمورنڈم پیش کیا ہے۔انہوں نے کہا کہ 2014 کے سیلاب کے مقابلے میں جب کشمیر کو بھاری نقصان پہنچا تھا، اس بار نقصان وادی کے بجائے جموں میں زیادہ ہے۔ میمو بھیجا گیا ہے اور ہمیں امید ہے کہ جموں و کشمیر کو جلد ہی سیلاب کا پیکج دیا جائے گا۔
خاندانی سیاست
وزیر اعلیٰ نے بی جے پی پر دوہرے معیار کا الزام لگاتے ہوئے کہا کہ پارٹی کو اپنے اندرخاندانی سیاست پر کوئی اعتراض نہیں ہے لیکن وہ اس اصطلاح کو صرف حریفوں پر حملہ کرنے کے لیے استعمال کرتی ہے۔
