محمد بشارت
کوٹرنکہ//ریاسی ضلع کے دور افتادہ پہاڑی علاقہ چسانہ کے ڈھوک اڑنگ میں ایک اندوہناک واقعے میں ایک خانہ بدوش خاندان کو شدید مالی نقصان کا سامنا کرنا پڑا جب ان کے سینکڑوں مویشی شدید بارش کے دوران کچے مویشی شیڈ کے منہدم ہونے سے ہلاک ہو گئے۔یہ خاندان گرمیوں کے موسم میں حسبِ روایت اپنے مویشیوں کے ساتھ اونچے علاقوں کی طرف موسمی نقل مکانی پر تھا۔ ڈھوک ارنگ میں واقع ان کا کچا مویشی خانہ شدید بارش کی وجہ سے زمین بوس ہو گیا، جس کے نتیجے میں کئی بھیڑیں اور بکریاں ملبے کے نیچے دب کر مر گئیں۔متاثرہ خاندان کی شناخت محمدایوب ولدکالا، ساکن راجوری کے طور پر ہوئی ہے، جو اپنے کنبے اور مویشیوں کے ساتھ ڈھوک ارنگ میں مقیم تھا۔ واقعے کے وقت خاندان کے افراد شیڈ سے باہر تھے، یوں انسانی جانوں کا نقصان تو نہیں ہوا، لیکن ان کے لئے مویشی ہی زندگی کا سہارا تھے جن کے مرنے سے انہیں سخت معاشی بحران کا سامنا کرنا پڑا ہے۔علاقہ مکینوں کے مطابق مذکورہ شخص کا خاندان انتہائی غریب ہے اور ان کی روزی روٹی کا واحد ذریعہ یہی مویشی تھے۔ مویشیوں کی ہلاکت سے خاندان کو ناقابل تلافی نقصان پہنچا ہے۔ مقامی لوگوں نے انتظامیہ سے اپیل کی ہے کہ متاثرہ خاندان کو فوری مالی امداد فراہم کی جائے تاکہ وہ دوبارہ اپنے پیروں پر کھڑے ہو سکیں۔علاقے میں گزشتہ کئی دنوں سے بارشوں کا سلسلہ جاری ہے جس کی وجہ سے پہاڑی علاقوں میں کچے مکانات اور مویشی شیڈز منہدم ہونے کے واقعات میں اضافہ ہوا ہے۔ مقامی انتظامیہ کو چاہیے کہ ایسے خانہ بدوش خاندانوں کی رہائش اور مویشیوں کے تحفظ کے لئے موثر اقدامات کرے۔متاثرین نے بھی حکومت سے اپیل کی ہے کہ نہ صرف فوری مالی مدد دی جائے بلکہ مستقبل میں ایسے سانحات سے بچنے کے لئے مضبوط ڈھانچوں کی تعمیر کے لیے تعاون فراہم کیا جائے۔
