سرینگر /گورنر کے مشیر کیول کمار شرما نے سنیچر کو کہا کہ ریاستی حکومت ریاست بھر میں 2020 تک بجلی کی کمی کے مسئلے کو حل کرے گی ۔پاور ڈیولپمنٹ ڈیپارٹمنٹ کی ایک اعلیٰ سطحی جائیزہ میٹنگ سے خطاب کرتے ہوئے کیول کماررما نے متعلقہ افسران کو ہدایات دیں کہ وہ ان علاقوں تک اپنی رسائی یقینی بنائیں جہاں بجلی کے پروجیکٹ ابھی تک مکمل نہیں کئے گئے ہیں ۔ انہوں نے کہا کہ بجلی ریاست جموں وکشمیر میں دوسرا اہم مسئلہ موجود ہے جسے ہر حال میں حل کیا جانا چاہئیے ۔ انہوں نے کہا کہ جب میری تقرری حال ہی میں کی گئی ، گورنر صاحب نے ریاست میں بجلی کے مسئلے سے نمٹنے کیلئے مجھے ہدایات دیں بالخصوص وادی کشمیر میں میری ہر ممکن کوشش جاری ہے کہ میں متعلقہ محکمے کے افسران سے نامکمل پروجیکٹوں کو مکمل کرنے کو یقینی بناؤں ۔
انہوں نے کہا کہ ریاست بھر میں بجلی کے مسئلے کو حل کرنے کیلئے سولر و دیگر قابلِ تجدید توانائی کو بروئے کار لا کر لوگوں کی بجلی کی ضرورتیں پوری کریں ۔
بجلی کے بحران سے نمٹنے کیلئے کئے جا رہے اقدامات کی تفاصیل پیش کرتے ہوئے کیول کمارشرما نے کہا کہ اس سلسلے میں بڑی کامیابی آلسٹینگ گرڈ سٹیشن کی تکمیل ہے جو اس سال دسمبر کے مہینے میں ہی مکمل کیا جائے گا اوراس گرڈ سٹیشن کی بدولت وادی میں بجلی کے نظام میں بڑی حد تک استحکام آئے گا ۔ انہوں نے کہا کہ یہ پروجیکٹ 109 کروڑ روپے کی لاگت سے تعمیر کیا جا رہا ہے اور ابھی تک اس پروجیکٹ پر 81 کروڑ روپے خرچ کئے جا چکے ہیں ۔
میٹنگ کے دوران چیف انجینئر پاور ڈیولپمنٹ ڈیپارٹمنٹ حشمت قاضی نے محکمے کی کلہم کارکردگی کا خلاصہ پیش کیا ۔ انہوں نے مشر کو بتایا کہ بجلی کی تقسیم کاری اور اوپریشن 11563 منظور شدہ ملازمین کی تعداد میں سے 9109 ملازمین چلا رہے ہیں ۔ انہوں نے مزید کہا کہ ای ایم آر ای کشمیر میں واحد ایک ایجنسی ہے جو 33 کے وی سطح کے نیچے بجلی کا نظام سنبھال رہی ہے ۔ انہوں نے مزید کہا کہ ای ایم آر ای ونگ 9.65 لاکھ صارفین کو بجلی فراہم کرتا ہے ۔
