روی شاشتری کی بھارتی کرکٹ ٹیم کے کوچ مقرر کرنے کی خبریں

نئی دہلی//ہندوستانی کرکٹ کنٹرول بورڈ (بی سی سی آئی) کی متزلزل پوزیشن کی طرح ٹیم انڈیا کے کوچ کے بارے میں بھی ھائي وولٹیج ڈرامے میں اسرار بنا ہوا ہے ۔کچھ گھنٹوں میں ہی کوچ کو لے کر خبروں کا بازار بدل گیا۔پہلے خبر آئی کہ روی شاستری کو ٹیم انڈیا کا نیا کوچ بنا دیا گیا ہے لیکن اس کے چند گھنٹے بعد ہی بی سی سی آئی کے سیکرٹری امیتابھ چودھری نے اس کی تردید کر دی ۔ٹیم انڈیا کے نئے کوچ کو لے کر منگل کو میڈیا میں خبروں کا بازار گرم رہا۔پہلے شاستری کے کوچ بننے کی خبر آئی لیکن کچھ دیر بعد ہی بی سی سی آئی کے سیکرٹری چودھری نے اس کی تردید کرتے ہوئے کہا کہ سچن تندولکر، سورو گنگولی اور وی وی ایس لکشمن کی تین رکنی کمیٹی کو اب کوچ کا فیصلہ کرنا ہے ۔انہوں نے میڈیا میں شاستری کے کوچ بننے کی خبروں کو یکسر خارج کر دیا۔منگل کا دن بی سی سی آئی کے لئے دو طرح سے سنسنی خیز رہا۔ایک طرف لوڈھا کمیٹی کی سفارشات کو لے کر اپنے خصوصی عام اجلاس (ایس جي ایم) کو ملتوی کر دیا گیا اور دوسری طرف کوچ کے معاملے پر بی سی سی آئی کو وضاحت دینا پڑی۔دراصل بی سی سی آئی کے انتظام و انصرام کرنے والی منتظمین کی کمیٹی کے چیئرمین ونود رائے نے پیر کی رات کو کہا تھا کہ کرکٹ ایڈوائزری کمیٹی (سی اے سی ) کو منگل کی شام تک کوچ کا فیصلہ کر لینا ہے ۔اسی درمیان میڈیا میں خبر آئی کہ شاستری کو کوچ بنا دیا گیا ہے ۔اس کے بعد تو یہ خبر میڈیا میں جنگل کی آگ کی طرح پھیل گئی اور سب جگہ یہ بات آ گئی کہ شاستری کوچ بن گئے ہیں اور ان کا دور اقتدار 2019 کے ون ڈے ورلڈ کپ تک کے لئے ہو گا۔سورو گنگولی، سچن تندولکر اور وی وی ایس لکشمن کی تین رکنی کرکٹ ایڈوائزری کمیٹی (سی اے سی ) نے کل ممبئی میں میراتھن اسٹائل میں پانچ امیدواروں کے انٹرویو لینے کے بعد کہا تھا کہ کپتان وراٹ کے امریکہ سے واپس لوٹنے کے بعد ان سے بات چیت کر کے کوچ کا اعلان کیا جائے گا۔سی اے سی کے اس اعلان کے بعد منتظمین کی کمیٹی کے چیئرمین ونود رائے نے سی اے سی کو ہدایت دی کہ وہ وراٹ سے بات چیت کریں اور منگل کی شام تک کوچ کا اعلان کر دیں۔سی اے سی نے پانچ امیدواروں شاستری، وریندر سہواگ، ٹام موڈی، رچرڈ پائی بس اور لال چند راجپوت کے انٹرویو کیے تھے ۔لینڈل شمون اس عمل کے لئے دستیاب نہیں ہو سکے تھے ۔سی اے سی رکن گنگولی نے انٹرویو کے بعد شام کو پریس کانفرنس میں کہا تھا کہ کوچ کے فیصلے کو فی الحال موخر کیا جا رہا ہے اور کوچ کا فیصلہ کپتان وراٹ کوہلی سے مشورے کے بعد ہوگا جو اس وقت امریکہ میں ہیں۔شاستری کو وراٹ کی پسند مانا جا رہا ہے جو اس سے پہلے ٹیم انڈیا کے ڈائریکٹر رہ چکے ہیں۔وہ اس وقت برطانیہ میں ہیں۔