روہنگیا ئی مسلمان ۔۔۔۔ سیاسی مباحثہ بنانے کی کوشش!

 مینمار میں ظلم و تشدد کا بازار گرم ہونے کے نتیجہ میں ہندوستان میں پناہ لینے والے روہنگیائی مہاجرین کو جس شدت کے ساتھ دائیں بازوں کی جماعتوںکی جانب سے نشانہ بنائے جانے کی سیاست کو پروان چڑھانے کی کوشش کی جارہی ہے، وہ اُن تمام بین الاقوامی معاہدات اور اصولوں کے خلاف ہے، جس پر ہندوستان سمیت اقوام متحدہ کی تمام رکن مملکتوں نے دستخط کئے  ہیں۔ جہاں ملک کی مختلف ریاستوں میں ان مظلوموں نےپناہ لی ہے وہیں ریاست جموںوکشمیر میں بھی 5743افراد پر مشتمل1219کنبے پناہ گزین ہیں ۔ چونکہ ان پناہ گزینوں کی زیادہ تر تعداد جموں صوبہ میںجگی جھونپڑیوں میں مقیم ہے، لہٰذا وہاں دائیں بازو سے تعلق رکھنے والے جماعتوں نے اس غمزہ گروہ ، جو روزانہ بینادوں پر محنت مشقت کرکے دووقت کی روٹی جٹاتا ہے، کے خلاف محاز کھول کر انہیں اپنی فرقہ ورانہ سیاست کا نشانہ بنانا شروع کیا ہے، مگر تشویشناک امر یہ ہے کہ اب حکمران اتحاد میں شامل بھاتیہ جنتا پارٹی بھی کھل کر انسانی اخلاق واقدار کےخلاف اس سیاست کے حق میں سامنے آنے لگی ہے۔ حالیہ اسمبلی اجلاس کے دوران اسپیکر نےبھی ان کےخلاف بیان دیکر انہیں مورد الزام ٹھہرانے کی کوشش کی۔ اگر چہ بعد ازاں انہوں نے اپنےالفاظ واپس لئے مگر اس سے متعلقہ معاملے پر بھاجپا کا مؤقف واضح ہو جاتا ہے، جو یقنی طور پر اس کی شریک اقتدار پی ڈی پی کے مؤقف کے برعکس ہے۔ بھاجپا اور دیگر دائیں بازو جماعتوں کی جانب سے جموں میں مقیم ان کنبوں کے خلاف ایک مخصوص مہم شروع کی گئی ہےاور انہیں جرائم پیشہ اور شدت پسند عناصرکانام دے کرواپس بھیجنے کی دھمکیاں دی جارہی ہیں ۔آج صورتحال یہ ہے کہ جہاں ان کا آبائی علاقہ رخائن جل رہاہے وہیں جموں میں بھی ان کیلئے زمین تنگ ہونے لگی ہے ۔ جموں میں کوئی بھی بات ہوتی ہے تو نشانہ روہنگیائی مسلمان بنتے ہیں ۔چاہے جرائم کا کوئی معاملہ ہو یاپھر فرقہ وارانہ نوعیت کاکوئی واقعہ ،روہنگیائی مسلمانوں کے خلاف مہم چلانے والے عناصر ذمہ داری انہی پر ڈال دیتے ہیں ۔ حتیٰ کہ حالیہ ایام میں سنجوا میں ایک فوجی کیمپ پر ہوئے حملے کے لئے ان ہی کو ذمہ دار ٹھہرانے کی کوشش کی گئی۔چند ماہ قبل جموں میں روہنگیائی بستی کے قریب ایک گائے کاکٹاہواسر پایاگیا جس پر کوئی تحقیقات ہونے سے قبل ہی الزام روہنگیائی آبادی پر لگادیاگیا۔اس حق میں کوئی بھی نہیں ہے کہ روہنگیائی مسلمان جموں میں ہی مقیم رہیں بلکہ سبھی یہ چاہتے ہیں کہ ان کے آبائی علاقے میں امن قائم ہو اور وہ بھی اپنے وطن واپس جاکر کام کاج کریں لیکن چونکہ فی الوقت میانمار میں ان کی نسل کُشی جاری ہے اس لئے ایسے حالات میں ان کو جموںسے نکلنے کی دھمکیاں دینا اور اس پر سیاست کرنا انسانیت کے منافی ہے ۔روہنگیائی ایک انسانی المیہ ہے اوریہ آبادی اس قدر یکطرفہ مظالم کاشکار ہے جس کی موجودہ دور میں کوئی مثال نہیں ملتی ۔انسانیت کا یہی تقاضہ ہے کہ حالات کے مارے ان کنبوں کو عارضی طور پر رہنے کیلئے جگہ دی جائے اور ان کے ساتھ انسانیت سے پیش آیاجائے ۔انہیں جرائم پیشہ ،ملک دشمن اور شدت پسندعناصر کا نام دینا اس انسانی المیہ کا حل نہیں ہے ۔جموں میں جس قدر جرائم بیرون ریاست کے شہریوں کے یہاں رہنے سے پھیل رہاہے ،وہ نوجوان نسل کیلئے تشویشناک ہے تاہم اس بارے میں کوئی بھی نہیں سوچ رہااور ہر برے کام کا الزام روہنگیائیوںپر ڈال دیاجاتاہے ۔جموں اورآس پاس کے علاقوں میں منشیات کا دھندہ اس قدر بڑھ چکاہے کہ صرف جموں ضلع میں لگ بھگ دو سو افراد اسی وجہ سے لقمہ اجل بن گئے اور ایک غیر سرکاری تنظیم کے سروے کے مطابق اس خطے میں ہر پانچواں نوجوان منشیات کا عادی ہے ۔ فی الوقت پولیس کی طر ف سے ساری ریاست میں منشیات مخالف چلائی جارہی اور گرفتار ہونے والوں میں مقامی لوگوں کے ساتھ ساتھ غیر ریاستی باشندے بھی شامل ہوتے ہیں خاص کرریاست پنجاب سے بیرون ریاست سے لائی جارہی منشیات، جو ریاست میں نوجوان نسل کو تاخت و تاراج کر رہی ہیں، کا دھندا کرنےو الوں پر اُن حلقوں کی جانب سے کوئی بات نہیں کی جاتی جو مہاجرین کےخلاف مہم چلا کر اُنہیں جرائم پیشہ جتلانے کی کوشش میں مصروف ہیں۔ جموں میں آباد روہنگیائی کنبوںکو شک کی نظروںسے دیکھنے کے بجائے ان کے ساتھ انسانیت کے طور پر پیش آناچاہئے اورعالمی برادری سمیت ہندوستانی قیادت کو بھی یہ کوششیں کرنی چاہئیں کہ ان کے آبائی علاقہ رخائن میں امن قائم ہو اور وہ بھی عزت سے اپنے گھر وں کو واپس جاسکیں ۔ اگر کوئی شخص کسی جرم میں ملوث ہوتو اس کے خلاف کارروائی کرنا قانون کا منطقی تقاضا ہے ۔تاہم مذہبی بنیادوں پر ہر ایک کو تشکیک کے دائرے میں لا کر مجرموں کے کھاتے میں ڈالنا انسانیت کے اصولوں کے منافی ہےاوروہ بھی ایسے حالات میں جب ان کا آبائی علاقہ جل رہاہو اور وہ یہاں غیر قانونی طور پر نہیں بلکہ اقوام متحدہ کے ادارہ برائے مہاجرین کی رجسٹریشن کے تحت رہ رہے ہوں اور فی الوقت انکے بارے میں سپریم کورٹ میں عرضی زیر سماعت ہے، لہٰذا اس پر سیاست کرنے کا کوئی جواز نہیں بنتا۔