نئی دہلی، 25 ستمبر (یواین آئی) سلامی بلے باز روھت شرما تیسرے ون ڈے میں اپنی نصف سنچری اننگز کی بدولت آسٹریلیا کے خلاف سب سے زیادہ رن بنانے والے دوسرے ہندوستانی کھلاڑی بن گئے ہیں اور انہوں نے اس معاملے میں سابق کپتان مہندر سنگھ دھونی کو پیچھے چھوڑ دیا ہے ۔روہت نے اندور کے ھولکر اسٹیڈیم میں اتوار کی رات تیسرے ون ڈے میچ میں آسٹریلیا کے خلاف 71 رنز کی اننگز کھیلی تھی۔ اسی کے ساتھ آسٹریلیا کے خلاف ون ڈے انٹرنیشنل کرکٹ میں ان کے 1403 رنز ہو گئے ہیں اور وہ اس ٹیم کے خلاف سب سے زیادہ رن بنانے والے دوسرے ہندوستانی بلے باز بن گئے ہیں۔ انھوں نے یہ اسکور 26 رن اننگز میں بنایا۔ اس معاملے میں سب سے آگے ماسٹر بلاسٹر سچن تندولکر ہیں جنہوں نے آسٹریلیا کے خلاف سب سے زیادہ 3077 رنز بنائے ہیں۔آسٹریلیا کے خلاف سب سے زیادہ رن بنانے والے ہندوستانی کھلاڑیوں کی فہرست میں سابق کپتان اور تجربہ کار وکٹ کیپر بلے باز دھونی تیسرے نمبر پر ہیں جن کے نام 40 اننگز میں 41.93 کی اوسط سے 1342 رنز ہیں۔ وہیں کپتان وراٹ کوہلی 26 اننگز میں 1122 رنز کے ساتھ اس فہرست میں چوتھے اور سابق کرکٹر محمد اظہرالدین 990 رنز کے ساتھ پانچویں نمبر پر ہیں۔سلامی بلے باز روہت کا آسٹریلیا کے خلاف 63.77 کا اوسط بھی ہے جو اس ٹیم کے خلاف اوسطاً 1000 رنز سے زیادہ بنانے والے اوورآل 29 بلے بازوں کی فہرست میں سب سے زیادہ ہے ۔ ان کے بعد اے بی ڈی ویلیرز ہیں، جن کا اوسط 59.52 ہے ۔تیسرے ون ڈے میں روہت (71) نے اجنکیا رہانے (70) کے ساتھ پہلے وکٹ کے لئے 139 رن کی شراکت بھی کی تھی جو ہندوستان کے پچھلے 20 ون ڈے انٹرنیشنل میچوں میں کسی جوڑی کی پہلی سنچری شراکت بھی تھی۔
آخری مرتبہ سال 2014 میں کٹک میں سری لنکا کے خلاف شکھر دھون اور رہانے کی جوڑی نے اوپننگ وکٹ کے لئے 231 رن کی سنچری شراکت کی تھی۔یواین آئی۔
